पालघरमध्ये सासऱ्याने केली जावयाची हत्या, गाढ झोपेत असताना कुऱ्हाडीने केले वार

पालघरमध्ये सासऱ्यानेच आपल्या जावयाची हत्या केल्याची धक्कादायक घटना समोर आली आहे. नेमकी ही हत्या कोणत्या कारणावरून झाली. पाहूयात सविस्तर

Palghar Crime News : महाराष्ट्रातील पालघर जिल्ह्यातून एक धक्कादायक बातमी समोर आली आहे.  पैशाच्या वादावरून  75 वर्षीय वृद्धाने आपल्या जावयाची कुऱ्हाडीने हत्या केल्याची घटना समोर आली आहे. हत्या केल्यानंतर आरोपी पळून गेला असल्याची माहिती एका पोलिस अधिकाऱ्याने एका वृत्तसंस्थेला दिली आहे. ही घटना वाडा परिसरात सोमवार आणि मंगळवारच्या रात्री घडली आहे. 

42 वर्षीय मृत व्यक्ती लोकांना नोकरी देण्याचे आश्वासन देऊन पैसे घेत होता. पण तो कधीही तो नोकरी देण्याचे काम पूर्ण करत नव्हता. अशाच प्रकारे मृत व्यक्तीने त्याच्या सासऱ्यांकडून देखील पैसे घेतले होते. याच पैशावरून दोघांमध्ये अनेकदा वाद देखील झाला. अनेकदा भांडणे देखील झाल्याची माहिती वाडा पोलीस ठाण्याचे वरिष्ठ निरीक्षक दत्तात्रेय किंद्रे यांनी दिली. 

नेमकं काय घडलं? 

दोन महिन्यापूर्वी दोघांमध्ये पैशावरून वाद झाला. दोघांमध्ये मोठ्या प्रमाणात भांडण देखील झालं. त्यानंतर आरोपीने त्याच्या जावयावर विळ्याने हल्ला केला होता. हल्ल्यानंतर पोलिसात गुन्हा देखील दाखल करण्यात आला होता. मात्र, सोमवार-मंगळवारच्या रात्री आरोपी हा जावयाच्या घरी पोहोचला. त्यावेळी घरी जावई गाढ झोपेत असतानाच आरोपीने त्याच्यावर कुऱ्हाडीने हल्ला केला आणि तेथून लगेच पळ काढला. त्यानंतर या घटनेची माहिती मिळताच स्थानिक पोलिसांनी घटनास्थळी धाव घेतली. सध्या पोलिसांनी मृतदेह शवविच्छेदनासाठी सरकारी रुग्णालयात पाठवला आहे. सध्या पोलीस आरोपी सासऱ्याचा शोध घेत आहेत. 

मृत व्यक्तीच्या नातेवाईकांनी आरोपीच्या विरोधात तक्रार दाखल केली आहे. पोलिसांनी मंगळवारी भारतीय न्याय संहितेच्या कलम 103 (1) खून अंतर्गत एफआयआर नोंदवला आहे. परंतु, अद्याप आरोपीला अटक करण्यात आलेली नाही. पोलिसांनी आरोपीचा शोध घेण्यासाठी पोलिसांचे पथक तैनात केले आहे. लवकरच आरोपीला अटक होईल असं अधिकाऱ्याने सांगितले. या घटनेमुळे परिसरात एकच खळबळ उडाली आहे. गेल्या अनेक दिवसांपासून पालघर जिल्ह्यात मोठ्या प्रमाणात गुन्हेगारी वाढली आहे.