नवरा-बायकोच्या भांडणात लेकाचा बळी, दौंड तालुक्यातील धक्कादायक घटना

Pune Crime News: पुणे जिल्ह्यातील दौंड तालुक्यात एक धक्कादायक घटना घडलीय. नवरा-बायकोच्या भांडणात 11 महिन्याच्या मुलाचा मृत्यू.

Pune Crime News: पुण्यातील दौंड तालुक्यातील केडगांव-आंबेगाव येथे एक धक्कादायक घटना घडली आहे.  नवरा बायकोच्या भांडणामध्ये 11 महिन्यांच्या चिमुकल्याचा डोक्यात त्रिशूळ मारून खून झाल्याची धक्कादायक केडगाव आंबेगाव पुनवर्सनमध्ये घडली आहे. यामध्ये अवधूत मेंगावडे असं मृत चिमुकल्याचं नाव आहे. नवरा बायकोच्या भांडणात निष्पाप मुलाचा जीव गेल्याने परिसरात हळहळ व्यक्त केली जात आहे.

नितीन मेंगावडे आणि पल्लवी मेंगावडे या नवरा बायकोचे जोरदार भांडण सुरू होते. हे भांडण खूपच वाढल्यानंतर नितीन यांच्या पत्नी पल्लवी हिने घरात असणारा त्रिशूळ हाती घेतला. तो त्रिशूळ नवऱ्याला मारण्याचा प्रयत्न केला. मात्र, नितीनने तो त्रिशूळ चुकविल्याने तो भांडणे सोडविण्यासाठी शेजारी उभ्या आलेल्या भाग्यश्री सचिन मेंगावडे या भावजयीच्या कडेवर असलेल्या 11 महिन्याच्या बालकाच्या डोक्यात घुसला आणि त्याचा मृत्यू झाला.

पोलिसांनी सांगितला घटनाक्रम

यवत पोलिसांकडून मिळालेल्या माहितीनुसार, सचिन मेंगावडे हे केडगांवमध्ये राहतात. किरकोळ गोष्टीवरून त्यांचे त्यांची बायको पल्लवी सोबत भांडण सुरू झालं. त्यावेळी पल्लवीने नवरा सचिन याला मारण्यासाठी त्रिशूळ उगारला. पण तो त्रिशूळ बाजूला उभ्या असलेल्या भाऊजयीच्या कडेवर असणाऱ्या 11 महिन्याच्या बाळाच्या डोक्यात घुसला. यात त्याचा जागीच मृत्यू झाला. जखमी झालेल्या अवधूतला उपचाराकरिता रुग्णालयात नेण्यात आले. पण तोपर्यंत अवधूतचा मृत्यू झाला होता. 

या घटनेची माहिती मिळताच यवतचे पोलिस निरीक्षक नारायण देशमुख हे घटनास्थळी दाखल झाले आणि त्यांनी आरोपी पल्लवी तिचा नवरा नितीन यांना ताब्यात घेत पुढील तपास सुरु केला आहे. कोणतीही चूक नसताना या 11 महिन्याच्या बालकाला आपला जीव गमवावा लागल्याने परिसरात हळहळ व्यक्त होत आहे.

अंधश्रद्धेतून हा प्रकार घडल्याचा पोलिसांना संशय

या घटनेत पोलिसांना वेगळाच संशय असून अंधश्रद्धेतून हा प्रकार घडला आहे का? आरोपींनी रक्ताने माखलेलं त्रिशूल आणि त्या ठिकाणचे रक्ताचे डाग पुसून पुरावा नष्ट करण्याचा प्रयत्नही केला आहे. यादृष्टीने पोलीस अधिक तपास करत आहेत.