बापाकडूनच नात्याला काळीमा! पोटच्या तीन मुलींवर केले लैंगिक अत्याचार; नालासोपाऱ्यातील संतापजनक घटना

नालासोपाऱ्यात नात्याला काळिमा फासणारी घटना घडली आहे. एका इसमाने आपल्या पोटच्या 3 मुलींवर लैंगित अत्याचार केल्याची माहिती समोर आलीय. तर एका मुलीचा चार वेळा गर्भपात केला आहे.

Nalasopara Crime News : पुण्यातील स्वारगेट बस स्थानकात 26 वर्षीय तरुणीवर बसमध्ये बलात्कार झाल्याची घटना घडली. ही घटना ताजी असतानाच आता नालासोपारामधून अशीच आणखी एक घटना समोर आली आहे. नालासोपाऱ्यात एका इसमाने आपल्या 3 मुलींवर बलात्कार केल्याची धक्कादायक घटना घडली आहे. या मुलींनी नालासोपारा पोलीस ठाण्यात तक्रार दिल्यानंतर हा संपूर्ण प्रकार उघडकीस आला आहे. मुलीचे वडील खंडणी, गोळीबार तसेच हत्येसारख्या गंभीर गुन्ह्यातील आरोपी आहे. 

बुधवारी नालासोपारा पोलिसांनी मुलींचे जबाब नोंदवून गुन्हा दाखल केला आहे. या प्रकरणी आरोपीचा शोध नालासोपारा पोलीस घेत आहेत. पीडित मुली या सख्ख्या बहिणी आहेत. त्या मूळच्या कोकणातील कणकवली येथे राहणार्‍या आहेत. या मुलींचा 56 वर्षीय पिता कुख्यात गुन्हेगार असून त्याला 5 मुली आहेत. कोकणातील गावी असताना तो या मुलींवर बळजबरी करून बलात्कार करत होता. यापैकी एका मुलीचा 4 वेळा गर्भपातही करण्यात आला होता अशी माहिती नालासोपारा पोलिसांनी दिली आहे. तर पोलिसांनी या नराधमाला कोकणातून अटक केली आहे.

मोठ्या मुलीचा चार वेळा गर्भपात

वडिलांच्या त्रासाला कंटाळून आई पाच मुलींना घेऊन नालासोपारा येथील एका नातेवाईकाच्या घरी आली. ज्यामध्ये मोठी मुलगी ही 21 वर्षांची असून इतर मुली तिच्यापेक्षा लहान आहेत. मोठ्या मुलींवर लैंगिक अत्याचार करून 4 वेळा मुलीचा गर्भपातही केला. नात्याला काळिमा फासणाऱ्या या घटनेमुळे सर्वत्र या घटनेबद्दल संताप व्यक्त होत आहे. आतापर्यंत वडिलांच्या दहशतीमुळे गप्प बसलेल्या मोठ्या मुलीने लैंगिक अत्याचाराची तक्रार दाखल करण्याचा निर्णय घेतला. त्यानंतर मोठ्या मुलीने नालासोपारा पोलिस ठाण्यात जावून याबाबतची फिर्याद दिली. तक्रारीनंतर नालासोपारा पोलिसांनी आरोपीविरोधात गुन्हा दाखल केला. गुन्हा दाखल होताच आरोपीविरुद्ध खून, हल्ला, गोळीबाराचे गुन्हे दाखल असल्याची माहिती समोर आली. या प्रकरणी पोलिसांनी आरोपीला ताब्यात घेतलं असून आता पोलीस त्याच्यावर काय कारवाई करणार याकडे सर्वांचं लक्ष लागलं आहे.