चण्यासारखा दिसणारा हा पदार्थ फक्त काश्मिरमध्येच मिळतो; याच्या सेवनानं मिळेल सातपट उर्जा

Health News : आरोग्यासाठी पूरक असणारी ही गोष्ट पाहताक्षणी चण्यासारखी दिसतेय  ना? पण हे चणे नाहीत. तर हे आहेत काश्मिरी लसूण. सहासा हा लसूण दैनंदिन वापरामध्ये कमीच येतो. मुळात काश्मिरमध्येच त्याचं उत्पादन घेतलं जातं. या लसुणाला एकपाकळी लसूणही म्हणतात. आश्चर्याची बाब म्हणजे सर्वसामान्य लसुणाहून यामध्ये 7 पट अशीच पोषकतत्त्वं असतात. 

हृदयाच्या आरोग्यासाठी हा काश्मिरी लसूण अधिक फायद्याचा असून, त्यामुळं रक्तातील बॅड कोलेस्ट्रॉल कमी होतं. काश्मिरी लसणाच्या पाकळीमुळं रक्तवाहिन्यांमध्ये असणारी सूज कमी होते. अँटी इंफ्लेमेटरी घटकांनी परिपूर्ण असा काश्मिरी लसूण हाडांना बळकटी देण्यास मदत तरतो, शिवाय सांधेदुखीचा त्रास कमी करण्यासही मदत करतो. 

यकृताच्या आरोग्यासाठीसुद्धा काश्मिरी लसूण प्रचंड फायद्याचा असून, फॅटी लिवर, लिवर सायरोसिस यांसारख्या समस्या त्यामुळं दूर होतात. यकृताची कार्यक्षमताही या लसणाच्या सेवनामुळं वाढते. 

काश्मिरी लसूण अँटीऑक्सिडेंट्स आणि फ्लेवोनोईड्सनं परिपूर्ण असल्यामुळं शरीरातील रोगप्रतिकारक शक्ती आणखी प्रभावीरित्या काम करु लागते. याशिवाय या लसणाच्या सेवनानं पचनक्रियाही सुधारते. गॅस, अपचन, पोट जड वाटणं अशा समस्या सतावत नाहीत. 

शरीराला उर्जा देण्याचं काम करताना हा लसूण रक्त पातळ करत रक्तवाहिन्यांमध्ये सुरु असणारी रक्ताभिसरण प्रक्रिया सुरळीत ठेवण्याचं काम करतो. काश्मिरी लसूण खाल्ल्यानं शरीरात नायट्रीक ऑक्साईडचा स्तर वाढून ते शरीरभर पसरतं. रक्ताभिसरण क्रियेत हा घटक महत्त्वाची भूमिका बजावतो. 

सामान्य लसणाच्या तुलनेत काश्मिरी लसणामध्ये एलिसिनचं प्रमाण अधिक असल्यामुळं तो अनेक आजारांना शरीरापासून दूर ठेवण्यास मदत करतो. हा लसूण खायचा झाल्यास त्याच्या पाकळीची साल काढून तो व्यवस्थित चावून खाल्ल्यानंतर लगेचच कोमट पाणी प्यावं. हा लसूण उपाशीपोटी खाल्ल्यास तो अधिक प्रभावीरित्या काम करतो. 

वरील माहिती सामान्य संदर्भांवर आधारित असून, झी 24 तास त्याची खातरजमा करत नाही.)