पालखी निघाली राजाची...; लालबागच्या राजापुढं कोळी बांधवांनी पारंपरिक वाद्यांवर धरला ठेका

Ganesh Visarjan 2023 : लालबागचा राजा, अर्थात स्थानिक आणि कोळी बांधवांसाठी मार्केटचा राजाही विसर्जनासाठी सज्ज झाला आहे. 

बाप्पाची मंडपातील अखेरची आरती होण्याआधी कार्यकर्त्यांची लगबग सुरु झाली आहे. तर, भाविकांनीही बाप्पाला निरोप देण्यासाठी गर्दी सुरु केली आहे. 

गणपती बाप्पाला निरोप देण्यासाठी करण्यात आलेल्या गर्दीमध्ये कोळी बांधवांचीही उपस्थिती पाहायला मिळाली. 

कोळ्यांचा गणपती म्हणून ओळखल्या जाणाऱ्या लालबागच्या राजाचरणी सलामी देण्यासाठी म्हणून गुरुवारी सकाळपासूनच कोळी बांधवांनी येण्यास सुरुवात केली. 

पारंपरिक वाद्यांच्या तालावर या मंडळींनी ठेका धरला आणि वाजत गाजत गणरायाला निरोप देण्याचं एक डोळ्यात पाणी आणणारं चित्र इथं पाहायला मिळालं. 

उत्साह पराकोटीचा होता आणि आहे. पण, या उत्साहाच्या मागं मनात कुठंतरी बाप्पा वर्षभरानंतरच आपल्याला भेटणार याचीही खंत डोकावत होती हे नाकारता येणार नाही. 

गणरायाचरणी एकच प्रार्थना, सर्वांना सुखात ठेव, विघ्न दूर ने आणि कायम पाठीशी उभा राहा!