जणू चंद्रावरच बांधलंय घर; महाराष्ट्रापासून हाकेच्या अंतरावर आहे हे कमाल ठिकाण, एकदा हे PHOTO पाहाच

Kutch Rann Utsav: प्रवास, पर्यटनाची आवड असणाऱ्या अनेकांसाठीच काही ठिकाणं कायमच आकर्षणाचा विषय असतात. गुजरातमधील असंच एक ठिकाण या काळात जगाच्या पाठीवर सर्वांचं लक्ष वेधत आहे. 

महाराष्ट्राचं शेजारी राज्य असणाऱ्या या गुजरातमधील कच्छचे रण या भागामध्ये सध्या अनेक पर्यटकांची पावलं वळताना दिसत आहेत. निमित्त ठरतोय तो म्हणजे सध्या सुरु असणारा 'रण उत्सव 2024- 2025'. 

कच्छचे रण हे तिथं असणाऱ्या पांढऱ्याशुभ्र वाळूच्या वाळवंटासाठी, मिठागरांसाठी आणि तेथील संस्कृतीसाठी ओळखलं जातं. इथं होणारा सूर्योदर, सूर्यास्त आणि चंद्रोदय पाहण्यासाठी अनेक पर्यटक का क्षेत्राला भेट देतात. 

2005 मध्ये तत्कालीन मुख्यमंत्री नरेंद्र मोदी यांनी या रण उत्सव नामक वार्षिक महोत्सवाची घोषणा केली होती. या महोत्सवामुळं इथं कला, परंपरेला वाव मिळाला असून, येथील अर्थकारण सुधारण्यासही हातभार लागला. 

कच्छ इथं आल्यावर येथील संस्कृती, स्थानिकांचं राहणीमान इथपासून येथील खाद्यसंस्कृतीतही जणू या भूमीचा आत्मा वास करतो याचीच जाणीव होते. 

कच्छमधील टेंट सिटी अर्थात अनेक तंबू असणारं एक लहानसं शहर या महोत्सवातील आकर्षणाचा केंद्रबिंदू आहे. मागील वर्षी जवळपास 7.42 लाख पर्यटकांनी या महोत्सवात सहभागी होत कच्छ जवळून अनुभवलं होतं. 

हस्तशिल्प, स्थानिक कला आणि येथील खाद्यसंस्कृतीला जवळून पाहण्याची संधी या महोत्सवामुळं मिळते. इथं येणाऱ्या पर्यटकांसाठी 3 स्टार सुविधा असणाऱ्या 400 तंबूंची उभारणी करण्यात आली आहे. 

इथं येणाऱ्यांसाठी विविध पॅकेजची सोय केली असून, तीन रात्री- चार दिवस (14500 रुपये माणसी), 2 रात्री- 3 दिवस (11000 रुपये माणसी), 1 रात्र-2 दिवस (5500 रुपये माणसी) अशा पॅकेजची आखणी करण्यात आली आहे. 

रण उत्सवाच्या निमित्तानं गुजरात पर्यटन विकास मंडळाकडूनही राज्यात येणाऱ्या पर्यटकांसाठी खास सुविधांची रेलचेल असून, इथं आलं असता जणून ही शुभ्र वाळू आपण चंद्रावरच असल्याची जाणीव करून देते.