Investment Scheme:तुमची पत्नी हाऊसवाईफ आहे? मग तिला 'अशा' प्रकारे बनवा लखपती

Investment Options for Housewife: सध्या नवरा बायको दोघेही नोकरी करतात पण अनेक घरांमध्ये हे काही कारणांमुळे शक्य नसते.  तुमची पत्नीदेखील गृहीणी असेल आणि तुम्ही तिला घरबसल्या करोडपती बनवायचा विचार करत असाल तर त्यासाठी पूर्ण नियोजन करावे लागेल. गृहिणी असल्यामुळे तिच्याकडे चांगला निधी नसल्याचं अनेक वेळा पाहायला मिळतं. पण तुम्ही घराची जबाबदारी संभाळणाऱ्या पत्नीसाठीदेखील लाखो रुपयांचा निधी सहज तयार करू शकता. यासाठी तुम्ही फक्त 500 रुपये किंवा 1000 रुपयांपासून गुंतवणूक सुरू करू शकता.

अनेक वेळा मुली काम करत नाहीत किंवा काही कारणास्तव त्यांना नोकरी सोडावी लागते. पण त्यांच्यासाठी तुम्ही दरमहा अवघे 1000 रुपये गुंतवून चांगला फंड तयार करू शकता. अशा अनेक सरकारी योजना आहेत, ज्यामध्ये कमी पैशातही गुंतवणूक सुरू करू शकता. पीपीएफ अर्थात सार्वजनिक भविष्य निर्वाह निधी, एसआयपी आणि आरडीसह अनेक पर्याय आहेत जिथे तुम्ही पैसे गुंतवू शकता. याबद्दल सविस्तर जाणून घेऊया.

तुम्ही तुमच्या गृहिणीसाठी PPF म्हणजेच सार्वजनिक भविष्य निर्वाह निधी योजनेत पैसे गुंतवू शकता. या योजनेत तुम्ही किमान 500 रुपये आणि कमाल 1.5 लाख रुपये गुंतवू शकता. या गुंतणवणूकीवर तुम्हाला 7.1 टक्के दराने व्याज मिळेल. तुम्हाला सार्वजनिक भविष्य निर्वाह निधी योजनेत 15 वर्षे सतत गुंतवणूक करावी लागेल. यानंतर तुम्हाला संपूर्ण पैसे व्याजासह मिळतील.

जर तुम्ही 15 वर्षांसाठी दरमहा 1000 रुपये जमा केले तर एका वर्षात 12,000 रुपये आणि 15 वर्षात 1,80,000 रुपये जमा होतील. यावर तुम्हाला 1 लाख 45 हजार 457 रुपये व्याज मिळेल आणि मॅच्युरिटीवर तुम्हाला एकूण 3 लाख 25 हजार 457 रुपये मिळतील.

अनेक गृहिणींनी म्युच्युअल फंडात SIP करण्यास सुरुवातदेखील केली आहे.  हा सर्वांच्या आवडता गुंतवणूकीचा पर्याय आहे. यामध्येही पैसे गुंतवून तुम्ही चांगले रिटर्न मिळवू शकता.  एसआयपीमध्ये गुंतणवणूक करुन तुम्हाला किमान 12 टक्के व्याज मिळेल. हे कमी किंवा जास्तदेखील असू शकते.

समजा तुम्ही दर महिन्याला 1 हजार रुपयांची SIP करत असाल, तर 15 वर्षात तुम्ही इथेही 1 लाख 80 हजार गुंतवाल. जर तुम्हाला 12 टक्के दराने व्याज मिळाले तर तुम्हाला 3 लाख 24 हजार 576 रुपये व्याजात मिळतील. अशाप्रकारे, तुम्हाला 15 वर्षांत5 लाख 4 हजार 576 रुपये मिळतील. यामध्ये तुम्हाला दीर्घकाळासाठी चक्रवाढीचा लाभही मिळतो.

गृहीणीसाठी पूर्णपणे सुरक्षित पर्याय शोधत असाल तर बँकेत आरडी देखील उघडू शकता. गुंतवणूकदारांना आरडीमध्ये निश्चित परताव्याचा लाभ देखील मिळतो. अल्प मुदतीसाठी गुंतवणूक करायची असेल तर पैसे गुंतवण्यासाठी आरडी हा सर्वोत्तम पर्याय आहे. तुम्ही पोस्ट ऑफिसमध्ये 5 वर्षांसाठी आरडी करू शकता. यावर तुम्हाला सुमारे 6.5 टक्के दराने व्याजाचा लाभ मिळेल.

जर तुम्ही दरमहा 1000 रुपये सलग 5 वर्षे गुंतवलेत तर 60 हजार रुपये गुंतवणूक रक्कम होईल. याच्या मॅच्योरिटीला  70 हजार 989 मिळतील. तुम्हाला हवे तेव्हा हे पैसे काढून एफडी करु शकता.