...मग मलाच नोटीस का? हक्कभंगाच्या नोटिसीला उत्तर देताना कामराचा सवाल; शिंदेंसंदर्भातील गाण्याचं प्रकरण तापलं

स्टॅण्डअप कॉमेडियन कुणाल कामराने विधानसभेमध्ये त्याच्याविरुद्ध हक्कभंग नोटीस जारी करण्यासंदर्भातील विषयावर कठोर शब्दांमध्ये उत्तर दिलंय. तो काय म्हणालाय पाहूयात...

माझ्या वक्तव्यांमुळे महाराष्ट्र विधिमंडळाच्या कामकाजात कोणताही व्यत्यय आला नाही. गाण्यात केवळ कलेचा वापर करत व्यंगात्मक, टीकात्मक पद्धतीने मते मांडलेली आहेत, असं स्टॅडअप कॉमेडियन कुणाल कामरा याने हक्कभंगाच्या नोटिसीला उत्तर दिले आहे.

सभागृहाचा अवमान करणे किंवा सदस्यांना चिथावणी देण्याचा त्यात कोणताही हेतू नव्हता, असं कुणाल कामराने हक्कभंगाच्या नोटिसीला उत्तर देताना म्हटलंय. 

शिवाय इतर राजकारण्यांनी जे भाषणात म्हटले, तेच मी गाण्यात वापरले, मग मलाच नोटीस का? असा प्रश्नही कामरा याने उत्तरात केला आहे.

कामराने काही महिन्यांपूर्वी उपमुख्यमंत्री एकनाथ शिंदे यांच्यावर एका लोकप्रिय हिंदी गाण्याच्या चालीवर आधारित गाण्याच्या माध्यमातून केलेल्या विडंबनामुळे वाद निर्माण झाला होता. 

कामराच्या या विडंबन गाण्याचा व्हिडीओ मोठ्या प्रमाणावर सोशल मीडियावर व्हायरल झाले, तर उद्धवसेनेच्या नेत्या सुषमा अंधारे यांनी हाच व्हिडीओ रिपोस्ट करत, शिंदेसेनेवर निशाणा साधला होता.

याचसंदर्भातून विधान परिषदेत भाजप गटनेते प्रवीण दरेकर यांनी हक्कभंगाची सूचना दिली होती. या हक्कभंगाच्या नोटिसीला कामरा याने लेखी उत्तर पाठविले आहे.

नागरिकांनी वैध मार्गाने अभिव्यक्ती स्वातंत्र्याचा वापर करत केलेली टीका रोखण्यासाठी हक्कभंगाचा ढालीसारखा वापर करता येणार नाही. सरकारमधील कोणत्याही व्यक्तीला टीका बोचरी वाटली, म्हणून हक्कभंग आणता येत नसल्याचेही कामराने नमूद केले आहे.

आता कामराच्या या उत्तरानंतर विधान परिषदेमध्ये भाजपाचे गटनेते प्रवीण दरेकर काय उत्तर देतात हे पाहणं महत्त्वाचं ठरणार आहे. कामरावर हक्कभंगाची कारवाई करण्यात आली तर त्याला सभागृहात उपस्थित रहावं लागू शकतं.