'ज्याचा एकही आमदार...', सरवणकरांची 'ती' टीका जिव्हारी लागल्याने राज ठाकरेंनी नाकारली भेट?

माहीम मतदारसंघामधील विधानसभेची लढत दुहेरी होणार की तिहेरी यासंदर्भातील संभ्रम उमेदवारी अर्ज मागे घेण्यासाठी अगदी शेवटचे काही मिनिटं बाकी असेपर्यंत कायम होता. अखेर मुख्यमंत्री एकनाथ शिंदेंच्या पक्षाचे उमेदवार सदा सरवणकर यांनी महीममधून लढण्यासाठी केलेला उमेदवारी अर्ज कायम ठेवत आपण अमित ठाकरेंविरुद्ध लढणारच अशी घोषणा केली आणि ही निवडणूक तिहेरीच होणार हे स्पष्ट झालं.

उमेदवारी अर्ज मागे घेण्यासंदर्भात अगदी शेवटच्या क्षणी सरवणकर हे राज ठाकरेंची भेट घेण्यासाठी त्यांच्या घरी पोहचले होते. मात्र राज ठाकरेंनी त्यांना भेट नाकारली. राज ठाकरेंनी सदा सरवणकरांऐवजी त्यांचा पुत्र समाधान सरवणकरांची भेट घेतली. याबद्दलची माहिती सदा सरवणकरांनीच प्रसारमाध्यमांना दिली.

"माझा मुलगा समाधान सरवणकर आणि महत्वाचे 4 पदाधिकारी राज ठाकरे यांच्या भेटीला गेले होते. माझे वडील तुमच्याशी बोलू इच्छितात असे माझ्या मुलाने सांगितले. मुख्यमंत्री एकनाथ शिंदे यांनी आम्हाला तुमच्याशी चर्चा करायला सांगितलं आहे, असे समाधान सरवणकर यांनी सांगितले. पण मला काही बोलायचं नाही. असे राज ठाकरे म्हणाले. तसेच त्यांनी मला भेटसुद्धा नाकारली," अशी माहिती सदा सरवरणकर यांनी प्रसारमाध्यमांशी बोलताना दिली. 

"मी सर्वसामान्य कार्यकर्ता आहे. काही समीकरणं त्यांना समजवावीत असं मला वाटलं होतं पण त्यांनी भेट नाकारली. तुम्हाला उभं राहायचंय तर उभं राहा. मला कोणाशीच बोलायचं नाही," असे राज ठाकरे म्हणाले," असं सदा सरवणकरांनी म्हटलं आहे.

"त्यांनी भेट नाकारल्याने विषय संपला असून मी अमित ठाकरेंविरुद्ध निवडणूक लढवणारच. पुढे काय करायचं हे मतदार ठरवतील. राज ठाकरे काही बोलले असते तर त्यांच्या शब्दाचा मान ठेवला असता. राज ठाकरे हे वरिष्ठ नेते आहेत. पण त्यांनी भेटच नाकारली," असं सरवणकरांनी सांगितलं.

"मी महायुतीचा उमेदवार आहे. त्यामुळे महायुतीचे सर्व नेते मला पाठींबा देतील," असा विश्वास सदा सरवणकर यांनी व्यक्त केला आहे. मात्र राज ठाकरेंनी सदा सरवणकरांची भेट नाकारण्यामागे त्यांनी काही दिवसांपूर्वी केलेलं एक विधान तर जबाबदार नाही ना? अशी चर्चा राजकीय वर्तुळात रंगू लागली आहे.

काही दिवसांपूर्वीच राज ठाकरेंनी एका वृत्तवाहिनीला दिलेल्या मुलाखतीमध्ये, देवेंद्र फडणवीस हे पुढील मुख्यमंत्री असतील असं मत व्यक्त केलं होतं. तसेच ते आमच्या सहकार्याने मुख्यमंत्री होतील असं सूचक विधानही राज यांनी केलं होतं. हे विधान राजकीय वर्तुळात चांगलेच गाजले.

29 ऑक्टोबर रोजी उमेदवारी अर्ज दाखल करुन झाल्यानंतर दुसऱ्या दिवशी प्रसारमाध्यमांशी बोलताना सरवणकरांना फडणवीस मुख्यमंत्री होतील या राज ठाकरेंच्या विधानावर प्रश्न विचारण्यात आला असता त्यांनी खोचक शब्दांमध्ये उत्तर दिलं होतं. सरवणकरांच्या या विधानाचा व्हिडीओ चांगलाच व्हायरल झालेला.

"या कालावधीमध्ये प्रत्येकाची वैयक्तिक मतं असतात. ज्याचा एकही आमदार नाही त्याने मुख्यमंत्री कोण असेल हे सांगणं किती हस्यास्पद आहे हे आपल्याला माहिती आहे. त्यामुळे मी त्यावर टीका करावी असं मला वाटतं नाही," असं सरवणकर म्हणाले होते. सरवणकरांची ही टीका राज यांच्या जिव्हारी लागल्याची चर्चा राजकीय वर्तुळात आहे.

"मुख्यमंत्री कोण हे पुढे महायुती ठरवेल. मला एवढच कळतं की मी या मतदरासंघात महायुतीचा उमेदवार म्हणून उभा राहणार आहे आणि लोकांच्या आशिर्वादाने निवडून येणार आहे," असं सरवणकर म्हणाले होते. 

राज ठाकरेंना सरवणकरांचे हेच विधान खटल्याने त्यांनी आज उमेदवारी अर्ज मागे घेण्यासंदर्भात त्यांना भेट नाकारली का? अशी चर्चा राजकीय वर्तुळात सुरु झाली आहे. राज ठाकरेंशी चर्चा झाली असती तर अमित ठाकरेंसाठी सरवणकरांनी माघारही घेतली असती असं सांगितलं जात आहे. त्यामुळे अमित ठाकरेंची निवडणूक अधिक सुखकरही झाली असती. 

महिममध्ये आता सदा सरवणकर विरुद्ध अमित ठाकरे विरुद्ध उद्धव ठाकरेंच्या शिवसेनेचे महेश सावंत अशी तिहेरी लढत रंगणार आहे.