एसटी एक आठवणी अनेक.... लाल परी @76

ST Bus Turns 76 years old : एसटी, लाल परी... रस्त्यानं धावणारी ही लाल परी आता 76 वर्षांची झालीय. विश्वास बसत नाहीये ना? 1 जून हा सर्वांच्याच लाडक्या एसटी बसचा वर्धापन दीन. 

गणेश उत्सव, आषाढी एकादशी , दिवाळी, कार्तिकी या आणि अशा अनेक सणवारांच्या आणि उत्सवाच्या माध्यमातून एसटी बसने गेल्या 76 वर्षांपासून सर्वसामान्य जनतेला सेवा पुरवली आहे. 

अशी ही एसटी आणखी एक वर्ष अनेक प्रवाशांना सेवा देऊ शकली, त्याचनिमित्तानं एसटीचा वर्धापन दिन राज्यारातील प्रत्येक एसटी आगारात साजरा केला जात आहे. या एसटी महामंडळाप्रती आणि या लालपरीप्रती कृतज्ञता व्यक्त केली जात आहे. 

एसटी बसशी सर्वांच्याच असंख्य आठवणी जोडल्या गेल्या आहेत. गावाला जायचा विषय निघाला, की आधी एसटीचं तिकीट काढण्याची लगबग आजही होते. 

प्रवासाची माध्यमं कितीही बदलली असली तरीही ही एसटी आजही अनेकांच्याच प्राधान्यस्थानी आहे. काळ बदलत गेला, तसतशी एसटीची रुपं बदलली. प्रवाशांच्या मागण्या आणि गरजा लक्षात घेता महामंडळानं आवश्यक ते बदल केले. 

इतकंच काय, आता तर एसटी चक्क वातानुकुलित अर्थात एसीमध्ये बसून गारेगार प्रवासाची सोयही करून देताना दिसते. कोकणापासून राज्याच्या असंख्य गावखेड्यांना जोडणाऱ्या या एसटीनं कळत नकळत प्रत्येकाच्याच जीवनात एक खास आणि कायमस्वरुपी जागा तयार केली आहे. 

एसटीच्या खिडकीतून मागे जाणारा गाव, निरोप देणारे आजी- आजोबा आजही अनेकांच्याच मनात घर करून आहेत. अशा या असंख्य आठवणी देणाऱ्या एसटीला, वर्धापन दिन्याच्या शुभेच्छा! 

अशा या एसटीशी, लाल परीशी तुमचीही एखादी आठवण जोडली गेलीय का? एसटीच्या खिडकीतून डोकावताना मागे पडणारं दृश्य पाहण्याचा सुखद अनुभव तुम्ही घेतलाय का? कमेंटमध्ये नक्की सांगा...