छत्रपतीही आई भवानीच्या भक्तीत तल्लीन! संभाजी राजांच्या शाही नवरात्रोत्सवाचे खास फोटो पाहिले का?

Navratri 2023 : छत्रपतींच्या कुटुंबाला पिढ्यानपिढ्या चालत आलेला वारसा मिळाल्यामुळं त्यांच्या सणउत्सव साजरा करण्याच्या पद्धतीही तितक्याच निराळ्या आणि खास आहेत. 

नवरात्रोत्सवाच्या निमित्तानंही याचीच एक झलक पाहायला मिळाली. नवरात्रीच्या पहिल्या दिवसाची पूजा संपन्न झाल्यानंतर संभाजीराजे छत्रपती यांनी या क्षणांची खास झलक सर्वांच्याच भेटीला आणली. 

भक्तीपूर्ण वातावरणात जुना राजवाडा येथील अंबा देवघरात घटस्थापना करण्यात आली, असं त्यांनी फोटोंवरील कॅप्शनच्या माध्यमातून सांगितलं. यावेळी संयोगीताराजे छत्रपतीही त्यांच्यासोबत होत्या. 

कॅप्शनमध्ये दिलेल्या माहितीनुसास जुना राजवाडा अंबा देवघरात पहिल्या माळेला आई तुळजा भवानीची धान्याच्या राशीतील आकर्षक खडी पूजा मांडण्यात आली होती.

छत्रपतींच्या कुटुंबाचा नवरात्रोत्सव हा आणखी एका  कारणासाठी खास असतो तो म्हणजे देवीची आभूषणं. कैक वर्षांचा इतिहास असणाऱ्या आभूषणांनी देवीचं रुप आणखी खुलून आल्याचं सर्वांनीच पाहिलं. 

देशभरात सध्या नवरात्रोत्सवाची धूम पाहायला मिळत असतानाच अशा पद्धतीनं दिग्गजांकडून परंपरा जपल्या जाताना पाहून अनेकांनाच या कुटुंबाचं कुतूहलही वाटलं. 

शारदीय नवरात्रोत्सवाच्या पहिल्या दिवसाचं औचित्य साधत संभाजीराजे छत्रपती आणि त्यांच्या पत्नी संयोगीताराजे छत्रपती यांनी कोल्हापूरच्या अंबाबाई मंदिरात जाऊनही देवीचं दर्शन घेतलं.