₹120000000000 संपत्ती असूनही लोकल ट्रेनमधून प्रवास; श्रीमंतांना दाखवतोय आरसा!

Niranjan Hiranandani inspirational story: देशाहस जगभरातील करोडपती आणि अब्जाधीशांच्या आलिशान जीवनशैलीची अनेकदा चर्चा होते. करोडो रुपयांचे बंगले, लाखो रुपयांच्या गाड्या, लक्झरी लाईफ अशा यांच्या कथा तुम्ही अनेकदा ऐकल्या असतील.

पण आज आम्ही तुम्हाला ज्या श्रीमंत माणसाबद्दल सांगणार आहोत त्याने त्याच्या साधेपणाने सर्वांचे मन जिंकले आहे. श्रीमंत व्यक्तींना या माणसाने आरसा दाखवलाय.

त्यांची एकूण संपत्ती 121207100000 रुपये आहे. पण तरीही ते मुंबईच्या लोकल ट्रेनमधून ऑफिसला जाताना दिसतात. त्यांचा व्हिडिओ सोशल मीडियावर व्हायरल होत आहे.

ज्यामध्ये रिअल इस्टेट टायकून त्यांच्या लक्झरी कारऐवजी मुंबई लोकलने प्रवास करताना दिसत आहेत. रिअल इस्टेट क्षेत्रातील प्रसिद्ध उद्योगपती निरंजन हिरानंदानी यांच्या साधेपणाने लोकांची मने जिंकली आहेत.

हिरानंदानी ग्रुपचे सह-संस्थापक आणि व्यवस्थापकीय संचालक निरंजन हिरानंदानी हे मुंबई लोकलमध्ये त्यांच्या ऑफिसला जाताना कॅमेऱ्यात कैद झाले. उल्हासनगर येथील त्यांच्या कार्यालयात पोहोचण्यासाठी हिरानंदानी मुंबई लोकल ट्रेनने गेले.

मुंबईतील प्रचंड वाहतुकीमुळे त्रस्त होऊन त्यांनी मुंबई लोकल ट्रेनने प्रवास करण्याचा निर्णय घेतला. 2023 च्या हुरुन यादीनुसार, देशातील 50 श्रीमंत व्यक्तींच्या यादीत समाविष्ट असलेले निरंजन हिरानंदानी हे दिखावा करण्याऐवजी वेळ वाचवण्यावर लक्ष केंद्रित करतात.

हुरुन यादीनुसार, भारतातील 50 सर्वात श्रीमंत व्यक्तींमध्ये समाविष्ट असलेल्या हिरानंदानी यांची मालमत्ता 121207100000 रुपयांची आहे. त्यांच्याकडे आलिशान गाड्यांचा संग्रहही आहे पण मुंबईच्या वाहतुकीत वेळ वाया घालवण्याऐवजी त्यांनी मुंबई लोकल ट्रेनने प्रवास करण्याचा निर्णय घेतला.

सामान्य लोकांसोबत प्रवासाचा आनंद घेत असताना काही लोक हिरानंदानी यांना ओळखतही नाहीत. जे त्यांना ओळखतात ते त्यांना भेटायला जातात. हस्तांदोलन करतात आणि सेल्फी काढतात.

निरंजन हिरानंदानी यांचा समावेश स्वयंनिर्मित अब्जाधीशांच्या यादीत होतो. त्यांनी शिक्षक म्हणून आपल्या कारकिर्दीची सुरुवात केली. हिरानंदानी यांनी चार्टर्ड अकाउंटंट होण्यासाठी शिक्षण घेतले. ते अकाउंटिंगचे शिक्षक होते.

काही वर्षे काम केल्यानंतर त्यांच्या भावासोबत हिरानंदानी ग्रुपची स्थापना केली. त्यांनी 1981 मध्ये कापड विणण्याच्या व्यवसायाने आपला व्यवसाय सुरू केला. हळूहळू त्यांनी रिअल इस्टेट व्यवसायात पदार्पण केले आणि यानंतर ते रिअल इस्टेट क्षेत्राचे बादशहा बनले.