बाबरच काय युवराजलाही धोबीपछाड... Hitman रोहितने 92 रन्स करत मोडले 'हे' 10 मोठे विक्रम

टी-20 वर्ल्ड कपच्या सुपर 8 फेरीतील शेवटच्या सामन्यात भारताने ऑस्ट्रेलियावर विजय मिळवला. या विजयात कर्णधार रोहितने मोलाचा हातभार लावला.

प्रथम फलंदाजी करण्यास निमंत्रित करण्यात आलेल्या भारतीय संघाच्या कर्णधाराने 41 बॉलमध्ये 92 धावांची तुफानी खेळी केली. अवघ्या 8 धावांनी त्याचं शतक हुकलं.

रोहितने त्याच्या तुफान खेळीमध्ये 7 चौकार आणि 8 षटकार लगावले. कोणत्याही टी-20 वर्ल्ड कप सामन्यामध्ये एकाच खेळीत भारतीयाने लगावलेले हे सर्वाधिक षटकार आहेत. कोणत्या संघाच्या खेळाडूने एकाच डावात ऑस्ट्रेलियाविरुद्ध लगावलेले हे सर्वाधिक षटकार आहेत.

तसेच या 8 षटकारांच्या मदतीने रोहित शर्माने अंतरराष्ट्रीय टी-20 सामन्यांमध्ये  200 षटकारांचा टप्पा ओलांडला. अंतरराष्ट्रीय टी-20 सामन्यात 200 षटकार लगावणारा तो पहिला क्रिकेटपटू ठरला आहे. रोहितच्या नावावर 203 षटकार आहेत. सिक्स मारण्याचा विचार केला तर रोहित जगात भारी खेळाडू आहे असं म्हणता येईल.

37 वर्षीय रोहित शर्माने 19 बॉलमध्ये अर्थशतक झळकावलं. त्याच्या टी-20 करिअरमधील हे सर्वात वेगवान अर्धशतक ठरलं.

रोहित शर्माचं हे अर्धशतक टी-20 क्रिकेटमध्ये ऑस्ट्रेलियन संघाविरुद्ध कोणत्याही खेळाडूने झळकावलेलं सर्वात वेगवान अर्धशथक ठरलं. यापूर्वी हा विक्रम युवराज सिंगच्या नावावर होता. त्याने 2007 मध्ये 20 बॉलमध्ये ऑस्ट्रेलियाविरुद्ध अर्धशतक झळकावलेलं.

20 चेंडूंच्या आत अर्धशतक झळकावणाऱ्या 7 खेळाडूंमध्ये रोहितचा समावेश झाला आहे. रोहित या यादीतील दुसरा खेळाडू आहे. याआधी युवराज सिंगने 20 बॉलमध्ये अर्धशतक झळकावलेलं. त्यापूर्वी युवराजनेच 2007 मध्ये 6 बॉलमध्ये 6 सिक्स लगावत अवघ्या 12 बॉलमध्ये अर्धशतकं झळकावलं होतं.

आपल्या 92 धावांच्या खेळीने रोहित शर्माने पाकिस्तानचा कर्णधार बाबर आझमचा टी-20 क्रिकेटमधील सर्वाधिक धावांचा विक्रम मोडला. 4165 धावा करत सध्या रोहित टी-20 मध्ये सर्वाधिक धावा करणारा खेळाडू ठरला आहे.

रोहित शर्माने टी-20 वर्ल्डकपमध्ये सर्वाधिक धावा करणाऱ्या फलंदाजांच्या यादीत दुसऱ्या स्थानी झेप घेतली आहे. त्याच्या नावावर आता 1154 धावा आहेत. केवळ विराट कोहली त्याच्याहून पुढे असून विराटच्या नावावर 1207 धावा आहेत.

92 धावांसहीत टी-20 वर्ल्ड कप 2024 स्पर्धेमध्ये रोहित शर्मा सर्वाधिक धावा करणारा भारतीय फलंदाज ठरला आहे. त्याने 6 सामन्यांमध्ये 191 धावा केल्यात. त्याच्या मागोमाग ऋषभ पंत (167) आणि सूर्यकुमार यादव (149) यांचा क्रमांक लागतो.

92 धावांची खेळी करत रोहितने अंतरराष्ट्रीय टी-20 वर्ल्ड कपमधील आपली सर्वोच्च धावसंख्या गाठली आहे. तर सर्वाधिक धावसंख्या करणाऱ्या खेळाडूंमध्ये रोहित दुसऱ्या स्थानी आहे. 2010 मध्ये सुरेश रैनाने दक्षिण आफ्रिकेविरुद्ध शतक झळकावलं होतं. 

रोहित शर्माने मिचेल स्टार्कच्या एका ओव्हरमध्ये 29 धावा केल्या. ही मिचेलच्या अंतरराष्ट्रीय कारकिर्दीमधील सर्वात महागडी ओव्हर ठरली. तर ऑस्ट्रेलियन गोलंदाजाने टाकलेली ही दुसरी सर्वात महागडी ओव्हर ठरली, यापूर्वी ग्लेन मॅक्सवेलने 2023 साली भारताविरुद्ध 30 धावा दिलेल्या.