दिसेल त्या भारतीय गोलंदाजाला फोडणाऱ्या पूरनचा अनोखा विक्रम; जे कोणालाच जमलं नाही ते करुन दाखवलं!

भारत आणि वेस्ट इंडीजदरम्यानच्या दुसऱ्या टी-20 सामन्यामध्ये यजमान संघाने भारतीय संघाला आणि चाहत्यांना धक्का दिला. वेस्ट इंडीजचा धडाकेबाज फलंदाज निकोलस पूरनने एकट्यानेच पाहुण्या संघातील गोलंदाजांची धुलाई केली. दिसेल त्या भारतीय गोलंदाजाला कुटणाऱ्या या फलंदाजाने नुकताच एक अनोखा विक्रम स्वत:च्या नावावर नोंदवलाय. त्याचबद्दल...

पूरन सध्याच्या घडीला टी-20 मधील सर्वात स्फोटक फलंदाजांपैकी एक असून तो सातत्यपूर्णपणे उत्तम कामगिरी करत आहे. त्याने मेजर क्रिकेट लीग 2023 मध्येच याची झळक दाखवली होती. त्याने 55 चेंडूंमध्ये नाबाद 137 धावा केल्या होत्या. 

सध्या पूरन भारतीय गोलंदाजीची पिसं काढताना दिसत आहे. भारताविरुद्ध अर्धशतक झळकावत पूरनने ऑस्ट्रेलियाचा माजी फलंदाज अॅरॉन फिंचचा विक्रम मोडीत काढला आहे.

गुयानामधील प्रोविडेन्स स्टेडियममध्ये झालेल्या दुसऱ्या टी-20 सामन्यामध्ये नाणेफेक जिंकून भारतीय कर्णधार हार्दिक पंड्याने प्रथम फलंदाजीचा निर्णय घेतला. मात्र भारताचे सलामीवर अगदी स्वस्तात तंबूत परतले. 

त्यानंतर सलग दुसऱ्या सामन्यात भारतीय संघाच्या मदतीला धावून आला तो तिलक वर्मा. त्याने 51 धावांची उत्तम खेळी करत भारतीय संघाला 152 धावांपर्यंत मजल मारण्यास मदत केली. 

153 धावांचा पाठलाग करताना यजमान संघाची अवस्था 10 धावांच्या आत 2 गडी बाद इतकी बिकट होती. त्याचवेळी निकोलस पूरन फलंदाजीला आला. मैदानात उतरल्यानंतर त्याने भारतीय गोलंदाजीची फिसं काढण्यास सुरुवात केली.

पूरनसमोर भारताचे सर्वच डावपेच अपयशी ठरल्याचं दिसून आलं. पूरनने केवळ 40 चेंडूंमध्ये 4 उत्तुंग षटकार आणि 6 चौकारांच्या मदतीने 67 धावांची धडाकेबाज खेळी केली.

भारताविरुद्धच्या 67 धावांच्या खेळीच्या माध्यमातून पूरनने टी-20 मधील अॅरॉन फिंचचा विक्रम मोडीत काढला.

भारताविरोधात निकोल पूरन अनेकदा प्रभावी कामगिरी करतो. त्याने भारताविरोधात अनेकदा मोठ्या धावसंख्या उभारताना खोऱ्याने धावा ओढल्यात असं म्हटल्यास चुकीचं ठरणार नाही. 

या फलंदाजीच्या जोरावर निकोलस पूरन आता भारताविरोधात टी-20 मध्ये सर्वाधिक धावा करणारा फलंदाज ठरला आहे. यापूर्वी हा विक्रम ऑस्ट्रेलियाचा माजी क्रिकेटपटू अॅरॉन फिंचच्या नावावर होता. फिंचने टी-20 मध्ये भारताविरोधात 500 धावा केल्यात. 

दुसऱ्या टी-20 मध्ये अर्धशतकीय खेळी करुन पूरनने भारताविरोधात फिंचपेक्षा अधिक म्हणजेच 505 धावा केल्या आहेत. टी-20 क्रिकेटमध्ये भारताविरोधात सर्वाधिक धावा करणाऱ्या खेळाडूंच्या यादीत तिसऱ्या स्थानी इंग्लंडचा फलंदाज जॉस बटलरचा समावेश आहे. त्याने भारतीय संघाविरोधात 475 धावा केल्या आहेत. 

पूररने आतापर्यंत भारताविरोधात टी-20 आंतरराष्ट्रीय क्रिकेट सामन्यांमध्ये 5 अर्धशतकं झळकावली आहेत. यामध्येही त्याने जॉस बटलर आणि क्विंटन डिकॉकला मागे टाकलं आहे. या दोघांनीही भारताविरोधात प्रत्येकी 4 अर्धशकतं झळकावली आहेत.