)
David Warner speaks on Air India Services: ऑस्ट्रेलियाचा माजी क्रिकेटपटू डेव्हिड वॉर्नरने अहमदाबादमध्ये झालेल्या भीषण विमान दुर्घटनेवर शोक व्यक्त केला आहे. या दुर्घटनेत 266 जणांचा मृत्यू झाला असून, वॉर्नरने या घटनेबाबत सोशल मीडियावर संवेदना व्यक्त केल्या आहेत. मात्र त्याचसोबत त्याने एअर इंडियावर तीव्र नाराजीही व्यक्त केली आहे. याशिवाय त्याने यापुढे कधीही एअर इंडियातून प्रवास न करण्याची शपथ घेतली आहे. वॉर्नरने इन्स्टाग्राम स्टोरीद्वारे आपली प्रतिक्रिया सर्वांसमोर मांडली आहे. यात त्याने एअर इंडियाच्या एका माजी क्रू मेंबरच्या वक्तव्याचा हवाला दिला आहे. त्या क्रू मेंबरनुसार, एअर इंडिया नियमितपणे खराब स्थितीत असलेल्या विमानांचा वापर करत आहे आणि त्यांनी प्रवाशांच्या सुरक्षेची कोणतीही गांभीर्याने दखल घेतलेली नाही.
हे पहिल्यांदाच घडले नाही की डेव्हिड वॉर्नरने एअर इंडियावर नाराजी व्यक्त केली आहे. मार्च महिन्यात त्याने असाच एक अनुभव शेअर केला होता. तेव्हा त्याने सांगितले होते की त्याला पायलट नसलेल्या विमानात बसवण्यात आले होते. विमानात तासन्‌तास थांबावे लागले आणि या अनुभवाने तो प्रचंड नाराज झाला होता. त्यावेळी वॉर्नरने पोस्ट करत विचारले होते, "जेव्हा पायलटच उपलब्ध नाही, तेव्हा एअर इंडियाने प्रवाशांना विमानात चढवतेच का?" यानंतर एअर इंडियाने सफाई देताना सांगितले होते की बंगळुरूमधील खराब हवामानामुळे अनेक विमानसेवांमध्ये उशीर होत आहे.
सध्याच्या दुर्घटनेनंतर वॉर्नरने पुन्हा एकदा आपली भूमिका स्पष्ट करत सांगितले की, एअर इंडियाने प्रवाशांच्या सुरक्षेच्या बाबतीत हलगर्जीपणा केला आहे आणि अशा कंपन्यांवर लोकांनी विश्वास ठेवू नये. त्यामुळे तो स्वतः एअर इंडियातून कधीच प्रवास करणार नसल्याचं त्याने जाहीर केलं आहे.
गेल्या गुरुवारी अहमदाबादहून लंडनकडे जाणाऱ्या एअर इंडिया फ्लाइटचा टेकऑफनंतर अपघात झाला. या बोइंग 787-8 विमानात एकूण 242 प्रवासी आणि क्रू मेंबर्स होते. यात 169 भारतीय, 53 ब्रिटिश, 7 पोर्तुगीज आणि 1 कॅनेडियन नागरिकांचा समावेश होता. अपघातात गुजरातचे माजी मुख्यमंत्री विजय रूपाणी यांचाही मृत्यू झाला. अपघातावेळी मेघाणीनगर परिसरात उपस्थित असलेल्या काही नागरिकांचाही मृत्यू झाला. एकूण 266 लोकांचा या दुर्घटनेत बळी गेला.
Newsletter