ऋषभ पंतची दुखापत किती गंभीर? तिसऱ्या मॅचमध्ये खेळणार की नाही? BCCI ने दिले अपडेट्स

IND VS ENG 3rd Test : भारत विरुद्ध इंग्लंड यांच्यात 5 सामन्यांची टेस्ट सीरिज खेळवली जात असून याच्यातील तिसरा सामना हा लॉर्ड्सच्या मैदानावर खेळवला जात आहे. पहिल्या दिवशी टीम इंडियाचा विकेटकिपर ऋषभ पंतला दुखापत झाली, त्याच्या दुखापतीबाबत बीसीसीआयने अपडेट दिले आहेत.

IND VS ENG 3rd Test : भारत विरुद्ध इंग्लंड (India VS England) यांच्यात 5 सामन्यांची टेस्ट सीरिज खेळवली जात असून यांच्यातील तिसरा सामना हा 10 जुलै पासून लॉर्ड्स मैदानावर खेळवण्यात येत आहे. सामन्याच्या पहिल्या दिवशी इंग्लंडने टॉस जिंकून फलंदाजीचा निर्णय घेतला. यावेळी पहिल्या दिवशी भारताला इंग्लंडच्या 4 विकेट घेणं शक्य झालं, तर दिवसाअंती इंग्लंडचा स्कोअर 251 धावा होता. पहिल्या दिवशी 34 व्या ओव्हर दरम्यान टीम इंडियाचा विकेटकिपर ऋषभ पंतला (Rishabh Pant) दुखापत झाली. यावेळी त्याला वेदनेनं कळवळत मैदानातून बाहेर पडताना पाहून टीम इंडियाच्या चाहत्यांना चिंता वाटू लागली. असं असताना पंतच्या दुखापतीबाबत बीसीसीआयने मोठे अपडेट दिले आहेत.  

पंतला दुखापत कशी झाली? 

लॉर्ड्सच्या मैदानावर भारत विरुद्ध इंग्लंड यांच्यात सामन्याच्या पहिल्या दिवसाच्या दुसऱ्या सेशनमध्ये टीम इंडियाला मोठा झटका बसला. 34 व्या ओव्हरला ऋषभ पंतच्या डाव्या हाताला बॉल लागला. त्यानंतर तो वेदनेनं कळवळू लागला. बुमराहच्या ओव्हरमधील पहिल्या बॉलला कलेक्ट करताना पंत दुखापतग्रस्त झाला. मैदानात फिजिओला बोलवण्यात आले. पण प्रथमोपचार केल्यावर सुद्धा त्याला बरं वाटलं नाही. त्याने कसे तरी स्वतःला विकेटकीपिंगसाठी तयार केले. त्याने ओव्हर संपवली आणि मग तो वेदनेनं कळवळत अचानकपणे मैदान सोडून ड्रेसिंग रूममध्ये जाऊ लागला. त्याच्या जागी ध्रुव जुरेलला पर्यायी विकेटकीपर म्हणून मैदानावर बोलावण्यात आले.

BCCI पंतच्या दुखापतीवर काय म्हणालं?

बीसीसीआयने विकेटकिपर ऋषभ पंतच्या दुखापतीबाबत माहिती देताना म्हटलं की, 'पंतच्या डाव्या हाताच्या तर्जनी बोटाला दुखापत झाली आहे. त्याच्यावर सध्या उपचार केले जात असून तो मेडिकल टीमच्या निरीक्षणाखाली आहे' . ऋषभ पंत या दुखापतीतून बरा होऊन पुन्हा लॉर्ड्स टेस्टच्या दूरवरील सामन्यात विकेटकिपिंग आणि फलंदाजी करताना दिसतो का हे महत्वाचं ठरणार आहे. ऋषभ पंत फक्त विकेटकिपर म्हणूनच नाही तर फलंदाज म्हणून सुद्धा भारतासाठी अत्यंत महत्वाचा आहे. त्याने लीड्स टेस्टमध्ये दोन्ही इनिंगमध्ये शतक ठोकलं होतं. तसेच दुसऱ्या टेस्ट सामन्यात सुद्धा त्याने चांगली फलंदाजी केली होती. 

हेही वाचा : यश दयालने ठोठावला हायकोर्टाचा दरवाजा, तरुणीने केले लैंगिक छळाचे आरोप

"Pant got hit on his left index finger. He is receiving treatment at the moment and under the supervision of the medical team". pic.twitter.com/Ka0kz4i7jS

— Mufaddal Vohra (mufaddal_vohra) July 10, 2025

लॉर्ड्स टेस्टसाठी भारत - इंग्लंडची प्लेईंग 11 : 

भारताची प्लेईंग 11 :

यशस्वी जयस्वाल, केएल राहुल, करुण नायर, शुभमन गिल (कर्णधार), ऋषभ पंत (विकेटकिपर), नितीश कुमार रेड्डी, रवींद्र जडेजा, वॉशिंग्टन सुंदर, आकाश दीप, जसप्रीत बुमराह, मोहम्मद सिराज

इंग्लंडची प्लेईंग 11 :

झॅक क्रॉली, बेन डकेट, ऑली पोप, जो रूट, हॅरी ब्रूक, बेन स्टोक्स (कर्णधार), जेमी स्मिथ (विकेटकिपर), ख्रिस वोक्स, ब्रायडन कार्स, जोफ्रा आर्चर, शोएब बशीर