IND vs ENG: आकाशदीपने रूटला बोल्ड केलेला बॉल ‘No Ball’ होता? MCC ने केला खुलासा

Akash Deep No Ball Controversy: बर्मिंगहॅममधील दुसऱ्या कसोटी सामन्याच्या चौथ्या दिवशी अकाश दीपने रूटला क्लीन बोल्ड केलं. तेव्हापासून सोशल मीडियावर एक चर्चा रंगली होती.

IND vs ENG 2nd Test: बर्मिंगहॅममध्ये झालेल्या दुसऱ्या टेस्ट सामन्याच्या चौथ्या दिवशी भारताचा वेगवान गोलंदाज अकाश दीपने इंग्लंडचा प्रमुख फलंदाज जो रूटला क्लीन बोल्ड केलं. मात्र त्यानंतर सोशल मीडियावर आणि इंग्लंडच्या काही मीडियात वाद सुरू झाला.  हा बॉल नो बॉल होता का? यावर खूप चर्चा झाली. आता या मुद्द्यावर तीन दिवसांनी मॅरिलबोन क्रिकेट क्लब (MCC) ने स्पष्ट भूमिका मांडली आणि या वादावर पूर्णविराम दिला.

वाद नेमका कशामुळे निर्माण झाला?

बीबीसीच्या टीएमएस कमेंटेटर अ‍ॅलिसन मिशेल यांनी तो बॉल टाकल्यानंतर लगेचच लक्ष वेधलं की अकाश दीपने मागचा पाय क्रीजच्या बाहेर ठेवला होता आणि त्यामुळे तो नो बॉल ठरतो. त्यांनी असंही नमूद केलं की, "त्याचा मागचा पाय परत जाणाऱ्या क्रीजच्या रेषेच्या सुमारे दोन इंच बाहेर पडतोय आणि हे अंपायरच्या नजरेत आलं नाही." त्यांच्या या विधानामुळे सोशल मीडियावर फोटो आणि व्हिडीओ क्लिप्स व्हायरल झाल्या. इंग्लंडचा माजी फलंदाज जोनाथन ट्रॉटनेही कमेंट्रीदरम्यान हेच मत मांडलं.

हे ही वाचा: तिसऱ्या टेस्टमध्ये बुमराहला मिळणार संधी? जाणून घ्या IND vs ENG 3rd Test Lord's ची संभाव्य प्लेइंग 11

MCC ने काय स्पष्ट केलं?

MCC ने या संदर्भात Cricbuzz ला सांगितलं की, "अकाश दीपने जो रूटला बाद केलं तेव्हा काहींना वाटलं की तो नो बॉल होता, कारण त्याचा पाय परत जाणाऱ्या क्रीजबाहेर दिसत होता. पण तिसऱ्या अंपायरने नो बॉल दिला नाही आणि MCC स्पष्ट करतं की, नियमांनुसार हा निर्णय योग्य आहे." MCC ने स्पष्ट केलं की बॅकफुट नो बॉलसंदर्भातील कायदा (Law 21.5.1) असा आहे की, गोलंदाजाचा मागचा पाय जमिनीवर पहिल्यांदा जिथे पडतो, त्याच्या आधारे निर्णय घेतला जातो. जर पहिला स्पर्श परत जाणाऱ्या क्रीजच्या आत झाला असेल, तर त्यानंतर पाय सरकून बाहेर गेला तरीही तो बॉल वैध धरला जातो.

हे ही वाचा: Happy Birthday Sourav Ganguly: 48 खोल्या, बंगाली परंपरा...वाढदिवसानिमित्त बघा 'दादा'च्या राजवाड्यासारख्या घरचे Inside Photos

इरफान पठानने काय सांगितलं?

या प्रकरणावर भारताचा माजी वेगवान गोलंदाज इरफान पठानने देखील स्पष्टीकरण दिलं. त्याने Sony Sports वर एका व्हिडीओमध्ये मुद्देसूद सांगितलं की, "खरा मुद्दा आहे 'फर्स्ट पॉइंट ऑफ कॉन्टॅक्ट'  म्हणजे पाय पहिल्यांदा जमिनीला कुठे लागतो. जर तो क्रीजच्या आत असेल, तर चेंडू वैध ठरतो." त्याने हळू गतीत अकाश दीपच्या रनअपचा व्हिडीओ दाखवला ज्यामध्ये दिसतं की, त्याची बोटं आधी जमिनीला क्रीजच्या आत लागतात आणि मग टाच थोडी बाहेर जाते. त्यामुळे तो नो बॉल ठरत नाही.

हे ही वाचा: एकेकाळी सलमानच्या अभिनेत्रीला डेट करत होता गांगुली! लग्न मोडायलाही होता तयार, जाणून घ्या अधुऱ्या प्रेमकहाणीबद्दल

इंग्लिश मीडियाकडून अनावश्यक वाद?

पठानने इंग्लिश मीडियावरही सूचक टीका करत म्हटलं, "ही एक अनावश्यक वादाची निर्मिती आहे. योग्य नियम समजावून घेतला तर लक्षात येतं की अकाश दीपने पूर्णपणे कायद्याच्या चौकटीत रूटला बाद केलं."