)
Pro Govinda League: गोविंदांना हक्काचे व्यासपीठ मिळवून देणाऱ्या बहुप्रतिक्षीत 'प्रो गोविंदा लीग'च्या तिसऱ्या पर्वाचा शुभारंभ या वर्षीच्या चषकाचे अनावरण करून करण्यात आला. हा सोहळा मीरा-भाईंदर येथे संपन्न झाला.प्रो गोविंदा लीग'चे तिसरे पर्व ७, ८ आणि ९ ऑगस्ट २०२५ रोजी वरळी येथील प्रतिष्ठित डोम, एसव्हीपी स्टेडियममध्ये आयोजित केले केले आहे. यावर्षीचे पर्व अधिक भव्य आणि नेत्रदीपक असणार आहे, ज्यात १६ व्यावसायिक संघ, ३२०० हून अधिक गोविंदा आपले कौशल्य, सामर्थ्याचे प्रदर्शन करतील. गोविंदा सीझन ३ मध्ये एकूण दीड कोटींची बक्षीसे ठेवण्यात आली आहेत. स्पर्धेत प्रथम पारितोषिक ७५ लाख रुपये, द्वितीय पारितोषिक ५० लाख रुपये, तृतीय पारितोषिक २५ लाख रुपये आणि प्रत्येक सहभागी संघांना प्रत्येकी ३ एक लाख रुपये पारितोषिक म्हणून दिले जाणार आहेत.
प्रो गोविंदा सीझन ३ च्या चषकाचे अनावरण प्रसिद्ध किक्रेट पटू तथा प्रो गोविंदा तिसऱ्या पर्वाचा ब्रँड अ‍ॅम्बेसेडर ख्रिस गेल, महाराष्ट्राचे परिवहन मंत्री प्रताप सरनाईक आणि विला फ्रांका संघ यांच्या प्रमुख उपस्थितीत करण्यात आले. यानंतर तरुण गोविंदांनी सादर केलेल्या सात थरांच्या मानवी मनोऱ्याच्या थेट प्रात्यक्षिकाने उपस्थित मान्यवरांची मनं जिंकली. या प्रसंगी ख्रिस गेल खेळाडूंसोबत सहभागी होत त्यांनी या सांस्कृतिक सोहळ्याला एक वेगळीच झळाळी प्राप्त करून दिली.
यावेळी आंतरराष्ट्रीय क्रिकेट पटू ख्रिस गेल म्हणाला, 'प्रो गोविंदा लीगचा ब्रँड अ‍ॅम्बेसेडर म्हणून जोडले जाणे हा माझ्यासाठी मोठा सन्मान आहे. मी जगभरात विविध खेळ पाहिले. पण गोविंदांमधील ऊर्जा, समन्वय आणि सांस्कृतिक अभिमान अतुलनीय आहे. प्रो गोविंदा ही लीग केवळ परंपरेचा उत्सव नाही, तर हा एक अनोखा क्रीडा प्रकार आहे, ज्यामध्ये जागतिक स्तरावर लोकांना आकर्षित करण्याची प्रचंड क्षमता आहे. यात शारीरिक ताकद, सांघिक कौशल्य आणि परंपरेचा अफलातून मिलाफ पाहायला मिळतो. जो जगाने यापूर्वी कधीही पाहायला नसेल. या प्रवासाचा एक भाग होताना मला खूप आनंद होत आहे. या स्पर्धेच्या अंतिम फेरीची मी आतुरतेने वाट पाहत आहे. जिथे भारत आपले सामर्थ्य जगासमोर सादर करेल'.
प्रो गोविंदा लीगने विला फ्रांकाच्या प्रतिनिधी मंडळाचे, ॲना मनरेसा बसोली, बाख लेल अँटोनी, फेलिक्स डियाझ प्रिटो मसाना आणि मिकेल फेरेट मिरालेस यांचे स्वागत केले. या सांस्कृतिक देवाणघेवाणीतून मानवी मनोऱ्यांची परंपरा अधिक दृढ झाली. महाराष्ट्राच्या दहीहंडी परंपरेला जागतिक क्रीडाचा दर्जा मिळवून देणे हा प्रो गोविंदा लीगमागील उद्देश आहे.
प्रो गोविंदा लीगचे अध्यक्ष, पुर्वेश सरनाईक यांनी उपस्थितांशी संवाद साधला. प्रो गोविंदा लीगच्या आतापर्यंतच्या सर्वात रोमांचक पर्वासाठी आम्ही खूप उत्सुक आहोत. एकेकाळी स्थानिक पातळीवर साजरा होणारा उत्सव आता संस्कृती,शिस्त,सामर्थ्य आणि सांघिक कौशल्याचे जागतिक प्रदर्शन बनला आहे. ख्रिस गेल यांसारख्या आंतरराष्ट्रीय आयकॉनच्या सहभागामुळे प्रो गोविंदा तिसऱ्या पर्वाला एक वेगळी उंची प्राप्त झाली आहे. गोविंदांना आपली ऊर्जा आणि कौशल्य सादर करण्यासाठी प्रो गोविंदा लीग हे एक हक्काचे व्यासपीठ आहे.
महाराष्ट्राचे परिवहन मंत्री आणि प्रो गोविंदा लीगचे अध्यक्ष, श्री. प्रताप सरनाईक यांच्या दूरदृष्टी नेतृत्वाखाली, या लीगने पारंपरिक दहीहंडी उत्सवाला व्यावसायिकरित्या साहसी खेळ म्हणून एक नवी ओळख दिली आहे. महाराष्ट्र शासनाने याला अधिकृत मान्यता दिली असून, ही लीग सांस्कृतिक वारसा जतन करते आणि त्याच वेळी तरुण गोविंदांना त्यांचे कौशल्य दाखवण्यासाठी एक स्पर्धात्मक आणि आधुनिक व्यासपीठ उपलब्ध करून देते. या खेळातून ताकद, शिस्त आणि सांघिक कौशल्य प्रदर्शित केले जाते.
Newsletter