Chris Gayle Pro Govinda Season 3 brand ambassador: पारंपरिक दहीहंडीला व्यावसायिक रंग देणाऱ्या प्रो गोविंदा लीग सीझन 3 चा अंतिम टप्पा 7 ते 9 ऑगस्ट दरम्यान वरळी डोममध्ये पार पडणार आहे. यंदाच्या सत्रात संपूर्ण महाराष्ट्रासह देशभरातील दमदार गोविंदा पथकं भिडणार असून, प्रेक्षकांना थरार, कौशल्य आणि साहसाने भरलेली दहीहंडीची सर्वोच्च स्पर्धा पाहायला मिळणार आहे.
या स्पर्धेचं खास वैशिष्ट्य म्हणजे यंदा जगप्रसिद्ध वेस्ट इंडिजचा धडाकेबाज क्रिकेटपटू ख्रिस गेल याला ब्रँड ॲम्बेसेडर म्हणून निवडण्यात आलं आहे. त्यांच्या उपस्थितीमुळे या पारंपरिक खेळाला आंतरराष्ट्रीय ओळख मिळेल, असा विश्वास आयोजकांनी व्यक्त केला आहे.
यंदाच्या हंगामात एकूण 1.5 कोटी रुपयांची बक्षिसं जाहीर करण्यात आली आहेत. पहिल्या क्रमांकाचं पारितोषिक 75 लाख रुपये, दुसऱ्या क्रमांकासाठी 50 लाख, तर तिसऱ्या क्रमांकासाठी 25 लाखांचं पारितोषिक असणार आहे. विशेष म्हणजे, उर्वरित सर्व सहभागी संघांनाही प्रत्येकी 3 लाख रुपयांचं प्रोत्साहनपर बक्षीस दिलं जाणार आहे.
प्रो गोविंदा लीगचे अध्यक्ष पुर्वेश सरनाईक म्हणाले, “ही स्पर्धा आता केवळ सणापुरती मर्यादित राहिलेली नाही, तर ती एक व्यावसायिक आणि साहसी खेळाची ओळख बनली आहे. यामध्ये ताकद, शिस्त आणि टीमवर्कची खरी कसोटी लागते. ख्रिस गेलसारख्या दिग्गजाची साथ लाभल्यामुळे ही लीग जगभर पोहचण्याचं स्वप्न आता प्रत्यक्षात उतरू लागलं आहे.”
या स्पर्धेमुळे गोविंदा पथकांतील तरुणांना खेळाच्या माध्यमातून करिअरची नवी दिशा मिळत असून, महाराष्ट्राचा पारंपरिक वारसा नव्या पिढीकडे अधिक भक्कमपणे पोहचतो आहे.
Newsletter