भुशी डॅम, टायगर पॉईंट, लायन्स पॉईंट, लोहगड, एकवीरा देवी आणि... लोणावळ्यातील सर्व पर्यटनस्थळावंर बंदीचे आदेश; कुठेच फिरता येणार नाही

Lonavla Tourist Places News: लोणावळ्यातील सर्व पर्यटनस्थळावंर बंदीचे आदेश लागू करण्यात आले आहेत. भुशी डॅम, टायगर पॉईंट, लायन्स पॉईंट, लोहगड, एकवीरा देवी येथे कुठेच फिरता येणार नाही.

Lonavla Tourist Places Ban News:  पावसाने यंदा मान्सूनपूर्वीच हजेरी लावली आहे. त्यामुळं निसर्ग ही बहरुन गेलाय. हे पाहता, जर तुम्ही लोणावळा अथवा मावळ तालुक्यात वर्षाविहाराचे नियोजन करत असाल तर तुमच्यासाठी ही बातमी महत्वाची आहे. कारण लोणावळा (Lonavala Tourist Spot) आणि मावळ तालुक्यातील बहुतांश पर्यटनस्थळी पर्यटकांना सक्तीची मनाई करण्यात आली आहे. 

गेल्या वर्षी अख्ख कुटुंब धबधब्यात वाहून गेलं होतं, या घटनेची पुनरावृत्ती टाळण्यासाठी प्रशासनाने ही खबरदारी घेतलेली आहे. त्या अनुषंगाने पुणे जिल्हाधिकारी जितेंद्र डुडी यांनी या पर्यटनस्थळी कलम 163 लागू केले आहे. या दरम्यान पर्यटकांनी या पर्यटनस्थळी जाऊन नियमांचे उल्लंघन केल्यास त्यांना कारवाईला सामोरं जावं लागणार आहे. या पर्यटनस्थळातून भुशीधरण मात्र वगळण्यात आलेलं आहे. त्यामुळं हिरमोड झालेल्या पर्यटकांना भुशी धरणाच्या पायऱ्यांवर भिजण्याचा आनंद घेता येणार आहे. हा आदेश 7 जुन पासून ते 31 ऑगस्ट पर्यंत लागू असणार आहे

पर्यटकांना कुठं कुठं मनाई आहे?

एकवीरा देवी, कार्ला लेणी, भाजे लेणी, भाजे धबधबा, लोहगड किल्ला, विसापुर किल्ला, तिकोणा किल्ला, टायगर पॉईंट, लायन्स पॉईंट, शिवलिंग पॉईंट, पवना डॅम या परीसरात पर्यटकांमुळे गर्दी होत असून त्यावर पर्यटकांच्या सुरक्षेच्या दृष्टीने निर्बंध घालण्यात आले आहेत. त्यानुसार भारतीय नागरीक सुरक्षा संहिता-२०२३ चे कलम १६३ प्रतिबंधात्मक आदेश पुणे जिल्हाधिकारी डुडी यांनी लागू केले आहेत. यामुळे वर्षा सहलीचे नियोजन करत असाल तर लोणावळ्याला जाण्याचे अजिबात प्लॅनिंग करु नका.