થઈ જાઓ તૈયાર ! દિવાળી પહેલા હોમ, કાર અને પર્સનલ લોન થશે સસ્તી, RBI આપી શકે છે મોટી ભેટ

તહેવારોની સિઝનના આગમન સાથે સામાન્ય જનતાને વધુ એક સારા સમાચાર મળી શકે છે. આ વખતે માત્ર બજારોમાં જ રોનક નહીં, પરંતુ તમારા ખિસ્સાનો ભાર પણ હળવો થઈ શકે છે.

આ વખતે તહેવારોની સિઝન વહેલા શરૂ થઈ શકે છે. દિવાળી પહેલા રિઝર્વ બેંક ઓફ ઈન્ડિયા (RBI) સામાન્ય લોકોને મોટી ભેટ આપવાની તૈયારી કરી રહી છે. અહેવાલો અનુસાર, ઓગસ્ટમાં યોજાનારી નાણાકીય નીતિ સમિતિ (MPC)ની બેઠકમાં, RBI રેપો રેટમાં 25 બેસિસ પોઈન્ટનો ઘટાડો કરી શકે છે. જો આવું થાય, તો હોમ લોન, કાર લોન અને પર્સનલ લોનની EMI સસ્તી થઈ શકે છે. આનો સીધો ફાયદો સામાન્ય લોકોને થશે અને બજારમાં વપરાશ પણ વધી શકે છે.

સ્ટેટ બેંક ઓફ ઈન્ડિયા (SBI)ના રિસર્ચ રિપોર્ટમાં કહેવામાં આવ્યું છે કે RBI ઓગસ્ટ નીતિમાં "ફ્રન્ટલોડેડ" એટલે કે પૂર્વ-નિર્ધારિત ઘટાડાની વ્યૂહરચના અપનાવી શકે છે. 2017નું ઉદાહરણ આપતા, SBIએ કહ્યું કે ઓગસ્ટ 2017માં રેપો રેટમાં 25 bps ઘટાડા પછી દિવાળી સુધી રૂપિયા 1.95 લાખ કરોડનો વધારાનો ક્રેડિટ ગ્રોથ જોવા મળ્યો હતો. આમાંથી લગભગ 30 ટકા ફક્ત વ્યક્તિગત લોન હતી. આનો સીધો અર્થ એ છે કે જ્યારે પણ દિવાળી પહેલા વ્યાજ દર ઘટાડવામાં આવ્યા છે, ત્યારે બજારમાં લોનની માંગ અને વપરાશ વધ્યો છે.

રિપોર્ટમાં શું છે ?

રિપોર્ટમાં એમ પણ કહેવામાં આવ્યું છે કે ફુગાવો હાલમાં આરબીઆઈના ટાર્ગેટ બેન્ડમાં છે, આવી સ્થિતિમાં, લાંબા સમય સુધી નાણાકીય નીતિને કડક રાખવાથી આર્થિક વિકાસને નુકસાન થઈ શકે છે. નાણાકીય નીતિની અસર વિલંબિત હોવાથી જો આરબીઆઈ દર ઘટાડવામાં વિલંબ કરે છે, તો રોકાણ અને વપરાશ બંનેને નુકસાન થઈ શકે છે. એસબીઆઈ માને છે કે હમણાં રાહ જોવામાં કોઈ ખાસ ફાયદો નથી, તેના બદલે હવે કાર્યવાહીનો સમય છે. જો આરબીઆઈ દર ઘટાડે છે, તો તેનાથી અર્થતંત્રમાં માંગ વધશે અને રોકાણનું વાતાવરણ સારું થશે.