ચૌહાણ પરિવારનો માળો વિખેરાયો, ગોધરામાં ટ્રક બાઈક ટકરાતા એક જ પરિવારના 4 ના મોત

Accident News : પંચમહાલમાં ગોધરા-વડોદરા હાઈવે પર મોટો અકસ્માત... ટ્રક અને બાઈક વચ્ચેના અકસ્માતમાં એક જ પરિવારના ચારનાં મૃત્યુ... મૃતકમાં ત્રણ સગી બહેન અને પિતાનો સમાવેશ

Panchmahal News : પંચમહાલમાં ગોઝારા અકસ્માતમાં ચૌહાણ પરિવારનો માળો વિખેરાયો છે. ટ્રક અને બાઈક વચ્ચેના અકસ્માતમાં પિતા અને ત્રણ દીકરીઓનું કમાકમાટીભર્યું મોત નિપજ્યું છે. લગ્નમાં જઈ રહેલા પિતાપુત્રીઓને અકસ્માતમાં કાળ ભરખી ગયો.

પ્રાપ્ત માહિતી અનુસાર, પંચમહાલના ગોધરા વડોદરા હાઇવે પર તૃપ્તિ હોટેલ નજીક મોટો અકસ્માત સર્જાયો હતો. ટ્રક અને બાઈક વચ્ચે અકસ્માતમાં એક જ પરિવારના 4 ના ઘટના સ્થળે મોત નિપજ્યા હતા. મૃતકોમાં ત્રણ સગી બહેનો અને પિતાનું મોત થયું છે. 

મૃતકોના નામ 

• નયનાબેન રાજેન્દ્રસિંહ ચૌહાણ, ઉ.વ. 3 વર્ષ
• વર્ષાબેન રાજેન્દ્રસિંહ ચૌહાણ, ઉ.વ.12 
• મનીષાબેન રાજેન્દ્રસિંહ ચૌહાણ, ઉ.વ.10
• રાજેન્દ્ર સિંહ ચૌહાણ, ઉ.વ. 36

લગ્નમાં જઈ રહેલા ધોધંબા તાલુકાના બોર ગામના ચૌહાણ પરિવારને અકસ્માત નડ્યો હતો. ગોધરાની તૃપ્તિ હોટેલ પાસે બાઇક ઉપર સવાર એક જ પરિવારના ૪ લોકોના મોતથી અરેરાટી સર્જાઈ હતી. ટ્રક ચાલકે અડફેટે લેતા ઘટના સ્થળે જ પિતા-પુત્રીઓનું પ્રાણ પખેરું ઉડી ગયું હતું. હાલ મૃતદેહોને ગોધરા સિવિલ ખાતે લાવવામાં આવ્યા છે. પોલીસે ઘટના સ્થળે પહોંચી કાર્યવાહી હાથ ધરી છે.