એક પરિવારનું છોટા ઉદેપુરમાં અનોખું ચૂંટણી યુદ્ધ: માતા-પિતા અને બે પુત્રો ચૂંટણી મેદાનમાં ઉતર્યા!

છોટાઉદેપુરમાં એક જ પરિવારના ચાર સભ્યો ચૂંટણી મેદાનમાં. પતિ-પત્ની એક જ વોર્ડમાં આમને-સામને જ્યારે બે પુત્રો અલગ અલગ વોર્ડમાંથી નગરપાલિકાની ચૂંટણી લડી રહ્યા છે.

Municipal Elections in Chhota Udepur: છોટાઉદેપુર નગરપાલિકામાં સોમવારે ચૂંટણી યોજાઈ રહી છે. આ ચૂંટણીમાં એક અજીબોગરીબ વાત સામે આવી છે. છોટાઉદેપુરમાં એક જ પરિવારના ચાર સભ્યો ચૂંટણી મેદાનમાં છે. જી હા...એક જ પરિવારમાં પતિ-પત્ની એક જ વોર્ડમાં આમને-સામને જ્યારે બે પુત્રો અલગ અલગ વોર્ડમાંથી નગરપાલિકાની ચૂંટણી લડી રહ્યા છે.

છોટાઉદેપુર નગરપાલિકામાં એક જ પરિવારના ચાર સભ્યોએ ઉમેદવારી નોંધાવી છે. જેમાં પતિ-પત્ની અને તેમના બે પુત્રોનો સમાવેશ થાય છે. છોટાઉદેપુર નગરપાલિકાના વોર્ડ નં.6માં હાજી ફારૂક મોહંમદ ફોદાએ ભારત નિર્માણ મંચમાંથી ઉમેદવારી નોંધાવી છે. આ જ વોર્ડમાં તેમના પત્ની સાબેરાએ અપક્ષ ઉમેદવારી નોંધાવી છે. જ્યારે પુત્ર આરીફે ભાજપામાંથી વોર્ડ નં.3માં અને બીજા પુત્ર રમઝાને કોંગ્રેસમાંથી વોર્ડ નં.4માં ઉમેદવારી નોંધાવી છે. 

ફારૂકભાઈ કોદાએ જણાવ્યું હતું કે, હું 1991થી એટલે કે 6 ટર્મથી કોર્પોરેટર તરીકે ચૂંટાઈ આવુ છું. ચાર ટર્મ અપક્ષ અને બે ટર્મ કોંગ્રેસની પૈનલમાંથી ચૂંટણી લડયો હતો. ગત ટર્મમાં કોંગ્રેસ ટિકીટ નહી આપતા અપક્ષ પેનલમાં ઉમેદવારી કરી હતી અને જીત્યો હતો. આ વખતે મારા પત્નીએ મારી સામે જ અપક્ષ ઉમેદવારી કરી છે. તેમા અમારા પતિ પત્ની વચ્ચે મતભેદનું કારણ નથી પરંતુ રાજકીય પાર્ટીઓ મારૂ કોર્મ રદ્દ કરવાના પ્રયત્નો કરતા હતા એટલે મારી પત્નીએ અપક્ષ ઉમેદવારી નોંધાવી હતી. જો કે મારૂ ફોર્મ યથાવત રહ્યું છે. 

મારા બન્ને પુત્રો અલગ અલગ પાર્ટીમાંથી અલંગ અલગ વોર્ડમાં ચૂંટણી લડે છે. મારા બન્ને પુત્રોએ ભાજપામાંથી ટિકીટ માગી હતી પરંતુ કોઇ કારણસર રમઝાનનું ભાજપાએ ટિકીટ નહી આપતા તે કોંગ્રેસમાંથી લડી રહ્યો છે. બન્ને પુત્રો પ્રથમ વખત જ ચૂંટણી લડી રહ્યા છે.