યુવક સાથે પ્રેમાંધ બનેલી દીકરીની કરપીણ હત્યા, લાશની અંતિમવિધિ પણ કરી નાંખી, પણ...

મૂળ રાણપરડા અને સુરત ખાતે પિતા સાથે રહેતી જલ્પા 7 દિવસ પહેલા ભાગી ગઈ હતી. અન્ય જ્ઞાતિના યુવક સાથે પ્રેમાંધ બનેલી દીકરીની પિતા અને કાકાએ કરી હત્યા. બે વર્ષ પૂર્વે સગાઈ કરેલી પુત્રી ભાગી જતા તેને શોધી પિતા રાણપરડા પરત ફર્યા. જ્યાં ગત તા.7 માર્ચના રોજ પિતા તેમજ કાકાએ ઢોરમાર મારી ગળું દબાવી જલ્પાની હત્યા કરી નાખી.

Bhavnagar News: ભાવનગર જિલ્લાના પાલીતાણાના રાણપરડા ગામે એક પિતાએ તેના ભાઈ સાથે મળીને પોતાની અન્ય જ્ઞાતિના યુવક સાથે પ્રેમાંધ બનેલી પુત્રીની હત્યા કરી તેની લાશની બરોબર અંતિમવિધિ કરી નાખવાની ઘટનાએ ભારે ચકચાર મચી છે.જ્યારે આ ઘટના અંગેની જાણ પોલીસને થતા પોલીસે હત્યારા પિતા અને કાકા ની ધરપકડ કરી આગળની કાર્યવાહી હાથ ધરી છે.

ભાવનગરના પાલીતાણાના રાણપરડા ગામે એક પિતાએ અન્ય સમાજના યુવક સાથે પ્રેમાંધ બનેલી પુત્રીની ભાઈ સાથે મળી ગળું દબાવીને નાની દીકરીની હાજરીમાં જ હત્યા કરી તેની લાશની અંતિમવિધિ કરી નાખવાની ઘટના ગત તા.7 માર્ચના રોજ બનવા પામી હતી. પરંતુ પાપ છાપરે ચડીને પોકારે એમ પિતાની આ ક્રૂરતા આખરે સામે આવી હતા ભારે ચકચાર મચી છે. જેમાં મૂળ રાણપરડાના દીપકભાઈ રાઠોડ કે જેની પત્નીનું 10 વર્ષ અગાઉ અવસાન થતાં તે પુત્રી જલ્પા સાથે સુરત ખાતે રહેતા હોય અને જેની સગાઈ પણ કરી નાખવામાં આવી હોય ત્યારે જલ્પા 7 દિવસ અગાઉ કોઈ અન્ય જ્ઞાતિના યુવક સાથે ભાગી જતા પિતાએ તેની શોધખોળ કરી ભાગી જવાના બીજા જ દિવસે તેની ભાળ મેળવી પોતાના વતન રાણપરડા આવી ગયા હતા.

ગત તા.7 માર્ચના રોજ દીપકભાઈએ આ બાબતે તેના ભાઈ સાથે મળી જલ્પા ને ઢોરમાર મારી બાદમાં ગળું દબાવી હત્યા કરી નાખી હતી. જ્યારે પિતા અને કાકાએ આ ઘટનાની કોઈને જાણ કર્યા વગર તેની બારોબાર રાણપરડા ખાતે અંતિમવિધિ પણ કરી નાખી હતી. તેમજ કઈ ન બન્યુ હોય તેમ સુરત પરત પણ ફરી ગયા હતા જ્યારે દીપકભાઇનો ભાઈ પણ ગામમાંથી અન્યત્ર જતો રહ્યો હતો. પરંતુ આખરે આ પાપનો ઘડો ફૂટ્યો અને પોલીસને જાણ થતાં પોલીસે હત્યારા પિતા અને તેના ભાઈની ધરપકડ કરી આગળની કાર્યવાહી હાથ ધરી છે.