રાજ્યમાં 19 તાલુકામાં મેઘમહેર, વેરાવળમાં 5 ઇંચ, સુત્રાપાડામાં 4 ઇંચ વરસાદ

ગાંધીનગર : આજે 4 ઓગસ્ટથી 8 ઓગસ્ટ સુધી રાજ્યમાં સાર્વત્રિક વરસાદની આગાહી વચ્ચે સૌરાષ્ટ્ર કેટલાક જિલ્લામાં નોંધપાત્ર વરાદ વરસ્યો છે. આજે સવારે 6 વાગ્યે બપોરે 2 વાગ્યા સુધીમાં રાજ્યનાં 19 તાલુકામાં આજે વરસાદ નોંધાયો છે. જેમાં સૌથી વધારે 5 ઇંચ વરસાદ ગીર સોમનાથના વેરાવળમાં નોંધાયો છે. જ્યારે જૂનાગઢના માંગરોળ અને ગીર સોમનાથનાં સુત્રાપાડામાં 4 ઇંચ વરસાદ ખાબક્યો છે. રાજુલામાં 2 ઇંચ, તળાજા અને જાફરાબાદમાં દોઢ ઇંચ વરસાદ નોંધાયો હતો. જ્યારે જૂનાગઢમાં માળીયામાં 29 મિમિ, તલાલામાં 27 મિમિ અને કોડીનારમાં 26 મિમિ વરસાદ નોંધાયો છે.

ગઇકાલે રાજ્યનાં 29 તાલુકામાં વરસાદ નોંધાયો હતો. જેમાં સૌથી વધારે 4 ઇંચ જેટલા વરસાદ ગીર સોમનાથના સુત્રાપાડમાં નોંધાયો હતો. ત્યાર બાદ અમરેલીના બગસરામાં 33 મિમિ, ગીર સોમનાથના કોડીનારમા 32 મિમિ, ગીર સોમનાથના વેરાવળમાં 12 મિમિ અને વલસાડના ધરમપુરમાં 10 મિમિ વરસાદ નોંધાયો હતો. 

બંગાળની ખાડીમાં મંગળવારથી લો પ્રેશર સક્રિય થવાની 4થી 8 ઓગસ્ટ દરમિયાન રાજ્યમાં સાર્વત્રિક વરસાદની સાથે 3થી 6 ઓગસ્ટ દરમિયાન મુંબઇથી દક્ષિણ ગુજરાતના દરિયાકાંઠા વિસ્તારમાં ભારેથી અતિભારે વરસાદની વકી હવામાન વિશેષજ્ઞે કરી છે. અરબસાગરમાં દક્ષિણ પશ્ચિમ પવનોનો પ્રવાહ મજબુત બનશે. જેથી 3થી6 માં મુંબઇ સહિત દક્ષિણ ગુજરાતના કાંઠા વિસ્તારોમાં છવાશે. જેની અસર રૂપે રાજ્યમાં 4થી 6માં સાર્વત્રિક વરસાદ થઇ શકે છે.

બંગાળની ખાડીમાં 4 ઓગસ્ટે લો પ્રેશર સક્રિય થશે, તેની સાથે હાલમાં મોનસુન ટ્રફ પણ નોર્મલ સ્થિતીમાં છે, જે આગામી બે દિવસોમાં દક્ષિણ બાજુ સરકીને મજબુત બનશે. હાલમાં વાતાવરણમાં મધ્ય લેવલ પર પૂર્વ પશ્ચિમ પવનોનો કનર્વજન્સ ઝોન 17 ડિગ્રી નોર્થ પાસે રહેલો છે, જે ઉત્તર તરફ ખસશે. જેની અસરોથી અરબસાગરમાં તેમજ પશ્ચિમી કિનારા આસપાસ દક્ષિણ પશ્ચિમ પવનોનો પ્રવાહ મજબુત બનશે.