આ માસુમ ચહેરા પાછળ છે શાતિર મગજ! બાંગ્લાદેશી મોડેલને લઈને પોલીસે કર્યા ચોંકાવનારા ખુલાસા

Bangladeshi model India: કોલકાતામાં પોલીસે એક બાંગ્લાદેશી મોડેલ શાંતા પોલની નકલી દસ્તાવેજો સાથે ધરપકડ કરી છે. શાંતા પોલ એક એરલાઇન કંપનીમાં ક્રૂ મેમ્બર તરીકે કામ કરતી હતી અને 2019 માં મિસ એશિયા ગ્લોબલ રહી ચુકી છે. તે 2023 માં માન્ય પાસપોર્ટ સાથે ભારત આવી હતી પરંતુ અહીં આવ્યા પછી, તેણે નકલી ઓળખપત્ર બનાવીને એક એપાર્ટમેન્ટ ભાડે લીધું અને આંધ્રપ્રદેશના મર્ચન્ટ નેવી ઓફિસર સાથે લગ્ન કર્યા.

એક બાંગ્લાદેશી મોડેલની પોલીસે ધરપકડ કરી છે. શોધખોળ દરમિયાન મોડેલ પાસેથી ઘણા દસ્તાવેજો મળી આવ્યા, જેનાથી બધાને આશ્ચર્ય થયું. એવું કહેવામાં આવ્યું કે આ મોડેલ એક એરલાઇન કંપનીમાં ક્રૂ મેમ્બર તરીકે કામ કરતી હતી અને મોડેલિંગ પણ કરતી હતી. જોકે, હવે તે પોલીસ કસ્ટડીમાં છે.

ધરપકડ કરાયેલ મહિલાનું નામ શાંતા પોલ છે. તેની પાસેથી નકલી દસ્તાવેજો મળી આવ્યા છે. આ દસ્તાવેજોના આધારે તે ભાડાના મકાનમાં રહેતી હતી. એટલું જ નહીં, તેણે એક પુરુષ સાથે લગ્ન પણ કર્યા છે. પોલીસે જણાવ્યું કે શાંતા પોલ એક એરલાઇન કંપનીમાં ક્રૂ મેમ્બર તરીકે કામ કરતી હતી અને નાની મોટી મોડેલ પણ હતી.

2023માં આવી હતી ભારત અને પછી...
અત્યાર સુધીની તપાસમાં જાણવા મળ્યું છે કે તે 2023 માં બાંગ્લાદેશના બારીસાલથી માન્ય પાસપોર્ટ સાથે ભારત આવી હતી. અહીં આવ્યા પછી તેણે પોતાના નકલી ઓળખપત્ર બનાવડાવ્યા અને પછી એક પ્રોપર્ટી ડીલર દ્વારા કોલકાતામાં એક ફ્લેટ ભાડે લીધો. ઘર ભાડે રાખતી વખતે તેણે તેના મકાનમાલિકને કહ્યું હતું કે તેણે એક મુસ્લિમ પરિવારમાં લગ્ન કર્યા છે, જેના કારણે તેનો પરિવાર ખુશ નથી. હવે તે પરિવારથી અલગ રહેવા માંગે છે.

ભાડા કરાર માટે તેણે આધાર કાર્ડ, પાન કાર્ડ અને મતદાર ઓળખપત્ર જેવા મહત્વપૂર્ણ ઓળખપત્રો બતાવ્યા. જોકે, જ્યારે આની ચકાસણી કરવામાં આવી ત્યારે જાણવા મળ્યું કે તે બધા નકલી હતા. ફક્ત એક લગ્ન પ્રમાણપત્ર મળી આવ્યું, જે મુજબ તેના 5 જૂને આંધ્રપ્રદેશના રહેવાસી શેખ મોહમ્મદ અશરફ નામના વ્યક્તિ સાથે લગ્ન કર્યા હતા.

આ કેસ અંગે એક પોલીસ અધિકારીએ જણાવ્યું કે બંનેએ પહેલા એક એપાર્ટમેન્ટ ભાડે રાખ્યું હતું અને બાદમાં તેઓ ગોલ્ફ ગ્રીનમાં રહેવા લાગ્યા. એવું કહેવામાં આવી રહ્યું છે કે શાંતાએ કથિત રીતે તેના પતિ અશરફનો પાસપોર્ટ પોતાની પાસે રાખ્યો હતો. શેખ મોહમ્મદ અશરફ મર્ચન્ટ નેવીમાં કામ કરતા હતા. જ્યારે, શાંતા પોલે 2016 માં ઈન્ડો-બાંગ્લા સૌંદર્ય સ્પર્ધામાં બાંગ્લાદેશનું પ્રતિનિધિત્વ કર્યું છે અને 2019 માં મિસ એશિયા ગ્લોબલ બની છે. તેણે એર હોસ્ટેસ તરીકે પણ કામ કર્યું છે.