Covid-19 Update: છેલ્લા 24 કલાકમાં 54 હજારથી વધુ નવા કેસ, Delta Plus Variant 8 રાજ્યોમાં પહોંચી ગયો

નવી દિલ્હી: ભારતમાં કોરોના (Coronavirus) ની બીજી લહેરનો પ્રકોપ ઓછો થયો છે. પરંતુ આ બધા વચ્ચે કોવિડ-19નો નવો વેરિએન્ટ ડેલ્ટા પ્લસ પગપેસારો કરવા લાગ્યો છે. દેશમાં કોરોનાના નવા દૈનિક કેસ પાછા 50 હજાર ઉપર આવવા લાગ્યા છે. છેલ્લા 24 કલાકમાં કોરોનાના 54 હજારથી વધુ કેસ નોંધાયા છે. જ્યારે 1321 લોકોના મોત થયા છે. ગઈ કાલે જાહેર થયેલા આંકડા મુજબ સમગ્ર દેશમાંથી 50,848 દર્દીઓ નોંધાયા હતા. જ્યારે એક દિવસમાં 1,358 લોકોના મૃત્યુ થયા હતા. નવા ડેલ્ટા પ્લસ વેરિએન્ટના અત્યાર સુધીમાં 8 રાજ્યો અને કેન્દ્ર શાસિત પ્રદેશોમાં થઈને 40 જેટલા કેસ સામે આવી ચૂક્યા છે. 

છેલ્લા 24 કલાકમાં 54 હજારથી વધુ નવા કેસ
કેન્દ્રીય આરોગ્ય મંત્રાલયે બહાર પાડેલા આંકડા મુજબ છેલ્લા 24 કલાકમાં દેશભરમાંથી કોરોના વાયરસના નવા 54,069 દર્દીઓ નોંધાયા છે. આ સાથે કુલ કોરોના સંક્રમિતોનો આંકડો 3,00,82,778 પર પહોંચી ગયો છે. એક દિવસમાં 68,885 દર્દીઓ કોરોનાને માત આપીને રિકવર થયા છે. અત્યાર સુધીમાં 2,90,63,740 દર્દીઓ રિકવર થયા છે. 

India reports 54,069 new #COVID19 cases, 68,885 recoveries and 1,321 deaths in the last 24 hours, as per Union Health Ministry

Total cases: 3,00,82,778
Active cases: 6,27,057
Total recoveries: 2,90,63,740
Death toll: 3,91,981

Total vaccination: 30,16,26,028 pic.twitter.com/E1e2791qP8

— ANI (@ANI) June 24, 2021

એક દિવસમાં 1,321 દર્દીઓના કોરોનાથી મોત
સરકારી આંકડા મુજબ એક દિવસમાં 1,321 દર્દીઓએ કોરોનાના કારણે જીવ ગુમાવ્યો છે. આ સાથે કુલ મૃત્યુનો આંકડો હવે 3,91,981 પર પહોંચી ગયો છે. રસીકરણ અભિયાન હેઠળ અત્યાર સુધીમાં કોરોના રસીના 30,16,26,028 ડોઝ અપાયા છે. 

રિકવરી રેટ 96.61% થયો
આરોગ્ય મંત્રાલયના જણાવ્યાં મુજબ દેશમાં હવે કોરોનાથી રિકવરી રેટ વધીને 96.61% થયો છે. વીકલી પોઝિટિવિટી રેટ 5 ટકાથી નીચે જળવાઈ રહ્યો છે અને હાલ 3.04% છે.. હાલ ડેઈલી પોઝિટિવિટી રેટ 2.91% છે. 

#COVID19 | Recovery rate increases to 96.61%. Weekly positivity rate remains below 5%, currently at 3.04% and
daily positivity rate at 2.91%: Union Health Ministry

— ANI (@ANI) June 24, 2021

ગઈ કાલે 18 લાખથી વધુ ટેસ્ટિંગ
ઈન્ડિયન કાઉન્સિલ ઓફ મેડિકલ રિસર્ચના જણાવ્યાં મુજબ ગઈ કાલે દેશભરમાંથી 18,59,469 કોરોના ટેસ્ટિંગ કરાયા હતા. આ સાથે અત્યાર સુધીમાં કરાયેલા કુલ કોરોના ટેસ્ટિંગનો આંકડો હવે 39,78,32,667 પર પહોંચી ગયો છે. 

કોરોનાના ડેલ્ટા પ્લસ વેરિએન્ટે ચિંતા વધારી
કોરોનાના ડેલ્ટા પ્લસ વેરિએન્ટે ચિંતા વધારી દીધી છે. કેન્દ્રીય સ્વાસ્થ્ય મંત્રાલયે બુધવારે કહ્યું કે આ વેરિએન્ટને 'ચિંતાજનક સ્વરૂપ' (વીઓસી) શ્રેણીમાં વર્ગીકૃત કર્યો છે. મંત્રાલયે જણાવ્યું કે ડેલ્ટા ઉપરાંત ડેલ્ટા પ્લસ સહિત ડેલ્ટાના તમામ અન્ય વેરિએન્ટને પણ વીઓસી કેટેગરીમાં રાખવામાં આવ્યા છે. આ સાથે જ મહારાષ્ટ્ર, કેરળ અને મધ્ય પ્રદેશને સતર્કતા વધારવાનું અને જન સ્વાસ્થ્ય સંબંધિત યોગ્ય પગલાં ભરવાની સલાહ અપાઈ છે. 

મધ્ય પ્રદેશમાં ડેલ્ટા પ્લસ વેરિએન્ટ સંક્રમિત મહિલાનું મોત
રિપોર્ટ મુજબ મધ્ય પ્રદેશના ઉજ્જૈન જિલ્લામાં કોરોના વાયરસના ડેલ્ટા પ્લસ વેરિએન્ટથી બે લોકોના સંક્રમિત થવાની પુષ્ટિ થઈ છે. જેમાંથી એક મહિલાનું 23મી મેના રોજ મોત થયું છે. કહેવાય છે મહિલાએ હજુ પણ રસી લીધી નહતી. જ્યારે અન્ય એક મહિલા ડેલ્ટા પ્લસ વેરિએન્ટથી સંક્રમિત થવા છતા હવે સાજી થઈ ગઈ છે. આ વેરિએન્ટના અત્યાર સુધીમાં 40 જેટલા કેસ સામે આવ્યા છે અને તે 8 રાજ્યોમાં પહોંચી ગયો છે. 

8 રાજ્યોમાં પહોંચ્યો ડેલ્ટા પ્લસ વેરિએન્ટ
હિન્દુસ્તાન ટાઈમ્સના રિપોર્ટ મુજબ ડેલ્ટા પ્લસ વેરિએન્ટના સૌથી વધુ કેસ મહારાષ્ટ્રમાં નોંધાયા છે. જ્યાં અત્યાર સુધીમાં 21 લોકો આ વેરિએન્ટથી સંક્રમિત થયા છે. આ ઉપરાંત મધ્ય પ્રદેશમાં 6, કેરળ અને તમિલનાડુમાં 3-3, કર્ણાટકમાં 2 અને પંજાબ, આંધ્ર પ્રદેશ અને જમ્મુમાં એક- એક કેસ સામે આવ્યા છે.