નોંધી લો તારીખ ! 1 જુલાઈથી આ લોકોને નહીં મળે પેટ્રોલ-ડીઝલ, લાગુ થશે નવા નિયમો

No Fuel To Old Cars : સરકાર પ્રદૂષણ સામે લડવા માટે કડક પગલાં લઈ રહી છે. તેથી પરિવહન વિભાગે સ્પષ્ટતા કરી છે કે 1 જુલાઈથી એક્સપાયર થયેલા વાહનોને પેટ્રોલ અને ડીઝલ મળશે નહીં. જો પેટ્રોલ પંપ આવા વાહનોમાં ઈંધણ ભરે છે, તો તેમને કડક કાર્યવાહીનો સામનો કરવો પડી શકે છે.

No Fuel To Old Cars : દિલ્હી સરકાર પ્રદૂષણ સામે લડવા માટે કડક પગલાં લઈ રહી છે. જેના ભાગરૂપે 1 જુલાઈથી જે વાહનોનું રજીસ્ટ્રેશન સમાપ્ત થઈ ગયું છે તેમને પેટ્રોલ કે ડીઝલ વેચવામાં આવશે નહીં. પેટ્રોલ પંપ સંચાલકોને આ અંગે કડક સૂચનાઓ આપવામાં આવી છે. એક્સપાયર થયેલા વાહનોનો અર્થ જૂના વાહનો થાય છે. ડીઝલ વાહનોનું રજીસ્ટ્રેશન 10 વર્ષ માટે માન્ય છે, જ્યારે પેટ્રોલ વાહનોનું રજીસ્ટ્રેશન 15 વર્ષ માટે માન્ય છે. આવા વાહનોની યાદી પરિવહન વિભાગના ડેટામાં છે.

વાહન જૂનું છે કે નવું કેવી રીતે ઓળખાશે ?

દિલ્હીના 520 ફ્યુઅલ સ્ટેશનોમાંથી 500 પર નંબર પ્લેટ ઓળખતા ANPR કેમેરા લગાવવામાં આવ્યા છે. એર ક્વોલિટી મેનેજમેન્ટ કમિશનનું કહેવું છે કે 30 જૂન સુધીમાં બાકીના સ્ટેશનો પર ANPR કેમેરા લગાવવામાં આવશે. પેટ્રોલ પંપ પર વાહન આવતાની સાથે જ આ કેમેરા તેની નંબર પ્લેટ વાંચશે અને વાહન પોર્ટલ પરથી તેની નોંધણી વિગતો તપાસશે. જો વાહન જૂનું જણાયું તો ANPR કેમેરા એલર્ટ મોકલશે. જો પેટ્રોલ પંપ આવા વાહનોને ઇંધણ વેચતા જોવા મળશે, તો તેમની સામે કાયદેસરની કાર્યવાહી કરવામાં આવશે. અધિકારીઓ તમારા જૂના વાહનને જપ્ત કરી શકે છે અથવા તેને સીધા સ્ક્રેપિંગ માટે મોકલી શકે છે.

સમગ્ર NCRમાં આ નિયમ લાગુ કરવામાં આવશે

જૂના વાહનોને પેટ્રોલ ન આપવાનો નિયમ દિલ્હીથી શરૂ થશે. પરંતુ તે સમગ્ર NCRમાં લાગુ કરવામાં આવશે. NCRના પાંચ મોટા શહેરો - નોઈડા, ગુરુગ્રામ, ફરીદાબાદ, ગાઝિયાબાદ અને સોનીપતના ઇંધણ સ્ટેશનોમાં ANPR કેમેરા 31 ઓક્ટોબર સુધીમાં લગાવવામાં આવશે. આ નિયમ 31 માર્ચ, 2026 સુધીમાં NCRના અન્ય શહેરોમાં લાગુ કરવામાં આવશે.

વાહન જપ્તી ટાળવા માટે શું કરવું ?

મોટર વાહન કાયદાના નિયમો અનુસાર,  ડીઝલ વાહનોનું રજીસ્ટ્રેશન 10 વર્ષ માટે માન્ય છે, જ્યારે પેટ્રોલ વાહનોનું રજીસ્ટ્રેશન 15 વર્ષ માટે માન્ય છે. તે પછી રજીસ્ટ્રેશન સમાપ્ત થાય છે. અહીં તમારી પાસે બે વિકલ્પો છે - પ્રથમ, તમે તમારા વાહનને સ્ક્રેપ કરો અને નવી કારની ખરીદીમાં સરકારની સ્ક્રેપ નીતિ હેઠળ ઉપલબ્ધ સબસિડીનો લાભ લો. બીજો વિકલ્પ તમારા વાહન માટે નો-ઓબ્જેક્શન સર્ટિફિકેટ મેળવવાનો છે. જો તમને લાગે કે તમારું વાહન સારી રીતે જાળવેલું છે અને થોડા વધુ સમય માટે ચાલી શકે છે, તો RCની માન્યતા સમાપ્ત થાય તેના ઓછામાં ઓછા 60 દિવસ પહેલા તમારા વાહન માટે NOC માટે અરજી કરો.

આ માટે તમારા વાહનને પહેલા ફિટનેસ ટેસ્ટમાંથી પસાર થવું પડશે. જો વાહન ટેસ્ટ પાસ કરે છે, તો તમને NOC મળશે અને તે NOCની મદદથી તમારે તમારા વાહનનું ફરીથી રજીસ્ટ્રેશન કરાવવું પડશે. તમને જણાવી દઈએ કે ફરીથી નોંધણી ફક્ત 5 વર્ષ માટે માન્ય રહેશે. આ સાથે, તમારે ફિટનેસ ટેસ્ટ અને નોંધણી માટે સામાન્ય કરતાં વધુ પૈસા ચૂકવવા પડશે. પાંચ વર્ષ પછી પણ જો તમને લાગે કે તમારું વાહન ફિટ છે, તો તમારે તેની ફિટનેસ અને નોંધણી ફરીથી કરાવવી પડશે.