Cyclone Gulab: આ રાજ્યો પર તોળાઈ રહ્યું છે ગુલાબ વાવાઝોડાનું જોખમ, IMD એ યલ્લો અલર્ટ જાહેર કરી

Weather Update: આંધ્ર પ્રદેશ અને ઓડિશાના કેટલાક ભાગોમાં વાવાઝોડાનું અનુમાન છે. ભારત હવામાન વિભાગ (IMD) એ એક બુલેટિન બહાર પાડીને કહ્યું કે 26 સપ્ટેમ્બરની સાંજ સુધી ઉત્તર આંધ્ર પ્રદેશ અને નજીકના દક્ષિણ ઓડિશામાં એક વાવાઝોડું ત્રાટકવાનું અનુમાન કરાઈ રહ્યું છે. હવામાન ખાતા મુજબ બંગાળની ખાડી ઉપર એક હળવા દબાણનું ક્ષેત્ર બનેલું છે. જેના કારણે આગામી 12 કલાકમાં તે ચક્રવાતી તોફાનમાં ફેરવાય તેવી સંભાવના છે. 

IMD ના અનુમાન મુજબ આ વાવાઝોડું આગામી ગણતરીના કલાકોમાં ઉત્તર આંધ્ર પ્રદેશ અને દક્ષિણ ઓડિશાને પાર કરે તેવી સંભાવના છે. આ ચક્રવાતને ગુલાબ વાવાઝોડા (Cyclone Gulab) ના નામથી ઓળખવામાં આવશે. તેના પગલે પશ્ચિમ બંગાળના અનેક વિસ્તારોમાં ભારે વરસાદની આશંકા વ્યક્ત કરાઈ છે. 

26 સપ્ટેમ્બર સુધીમાં આવી શકે છે વાવાઝોડું
IMD એ ટ્વીટ કરીને પોતાની અલર્ટમાં કહ્યું કે ઉત્તર અને આસપાસના મધ્ય બંગાળની ખાડીમાં એક ડિપ્રેશન વધીને જલદી ડીપ ડીપ્રેશનમાં ફેરવાઈ રહ્યું છે. જેના કારણે આગામી 12 કલાકમાં તે તેજ બનીને વાવાઝોડામાં ફેરવાય તેવી શક્યતા છે. તે 26 નવેમ્બરની સાંજ સુધીમાં કલિંગપટ્ટનમની આસપાસ દક્ષિણ ઓડિશા ઉત્તર આંધ્ર પ્રદેશના કાંઠાને પાર કરે તેવી શક્યતા છે. 

Depression intnsfd into a Deep Depression over North & adj central BoB, likely to intnsify into a CS next 12 hrs & to cross south Odisha north AP coasts around Kalingapatnam by eve of 26Sept.
Cyclone Alert for north AP & adj south Odisha coasts Yellow Message #imd #cyclone pic.twitter.com/9Zru7Ybpm0

— India Meteorological Department (@Indiametdept) September 25, 2021

IMD એ જણાવ્યું કે NDRF ની 15 ટીમો પશ્ચિમ બંગાળના તટીય ક્ષેત્રોમાં 15 અને કોલકાતા માટે 4 ટીમોને પૂર, રાહત અને બચાવ કાર્યો માટે તૈનાત કરાઈ છે. 

બંને રાજ્યો માટે યલ્લો અલર્ટ
IMD એ આ બંને રાજ્યોમાં વાવાઝોડા માટે યલ્લો અલર્ટ બહાર પાડી છે. IMD એ પોતાની ટ્વીટમાં કહ્યું છે કે ઉત્તર આંધ્ર પ્રદેશ અને તેને અડીને આવેલા દક્ષિણ ઓડિશાના કાઠા વિસ્તારો માટે વાવાઝોડાની યલ્લો અલર્ટ જાહેર કરાઈ છે. 

શુક્રવારે હવામાન  ખાતાએ અલર્ટ બહાર પાડી હતી
આ અગાઉ હવામાન ખાતાએ ઉત્તર આંધ્ર પ્રદેશ અને દક્ષિણ ઓડિશાના કાંઠા વિસ્તારો માટે પણ એક વાવાઝોડાની અલર્ટ જાહેર કરી હતી. IMD એ શુક્રવારે ટ્વીટ કરીને કહ્યું હતું કે પૂર્વ-મધ્ય અને તેને સંલગ્ન પૂર્વોત્તર બંગાળની ખાડી પર ડિપ્રેશન જોવા મળી રહ્યું છે. ઉત્તર આંધ્ર પ્રદેશ અને દક્ષિણ ઓડિશાના કાંઠા માટે પૂર્વ-ચક્રવાત નિગરાણી થઈ રહી છે.