ટેસ્ટ મેચમાં બ્રેક દરમિયાન શું ખાય-પીએ છે ક્રિકેટરો ? ખુલ્યું મોટું રહસ્ય

ક્રિકેટ મેચમાં તમે બેટ્સમેનોને ઘણીવાર ક્રીઝ પર ડ્રિંક્સ બ્રેક દરમિયાન પ્રોટીન શેક પીતા કે કેળા ખાતા જોયા હશે. ત્યારે તમારા મનમાં સવાલ થતો હશે કે ક્રિકેટરો બ્રેક દરમિયાન શું ખાતા હશે. ત્યારે ઇંગ્લેન્ડના બેટ્સમેન ઓલી પોપે આ અંગે ખુલાસો કર્યો છે.

ઇંગ્લેન્ડના બેટ્સમેન ઓલી પોપે ખુલાસો કર્યો છે કે ટેસ્ટ મેચમાં બ્રેક દરમિયાન ક્રિકેટરો શું ખાય-પીએ છે. ઓલી પોપના મતે જે ક્રિકેટરો બેટિંગ નથી કરી રહ્યા તેઓ લંચ બ્રેક દરમિયાન ચિકન, માછલી અથવા પાસ્તા ખાય છે. ઓલી પોપે કહ્યું કે ટી બ્રેકમાં બધા ચા જ પીતા નથી, ઘણા ક્રિકેટરો કોફી પણ પીવે છે.

ટેસ્ટ મેચોમાં બ્રેક દરમિયાન શું ખાય-પીએ છે ક્રિકેટરો ?

સ્કાય સ્પોર્ટ્સ સાથે વાત કરતા ઓલી પોપે ખુલાસો કર્યો કે ખેલાડીઓની ખાવાની આદતો તેઓ મેદાન પર છે કે નહીં તેના પર આધાર રાખે છે. લંચ બ્રેક દરમિયાન ઓલી પોપે તેના આહાર વિશે પણ ખુલાસો કર્યો છે. ઓલી પોપે કહ્યું, 'સામાન્ય રીતે હું ચિકન, માછલી અને પાસ્તાથી મારા શરીરમાં શક્ય તેટલી શક્તિ મેળવવાનો પ્રયાસ કરું છું. જો હું બેટિંગ કરી રહ્યો છું, તો હું વધારે ખાતો નથી, કારણ કે મારા શરીરને વધુ ખોરાકની જરૂર નથી.'

ઓલી પોપે આગળ કહ્યું, 'મને આખો દિવસ બેટિંગ કરવા માટે ભારે લંચને બદલે સાદું ભોજન વધુ ગમે છે. એટલા માટે હું પ્રોટીન શેક અને કેળા ખાઉં છું. જો હું આખો દિવસ બેટિંગ કરું છું, તો દિવસના અંત સુધીમાં હું ભાગ્યે જ કંઈ ખાઈ શકું છું.'

'ટી બ્રેક' વિશે શું કહ્યું ?

ટેસ્ટ મેચમાં 'ટી બ્રેક' વિશે વાત કરીએ તો, તે બ્રિટિશ સંસ્કૃતિનો એક ભાગ છે. ઓલી પોપે સ્વીકાર્યું કે 'ટી બ્રેક' હંમેશા ચા પીવા સુધી મર્યાદિત નથી. ઓલી પોપે કહ્યું, 'કેટલાક લોકોને ચા પીવાનું ગમે છે. હું સામાન્ય રીતે કોફી પીઉં છું. ક્યારેક વરસાદ કે અન્ય કોઈ કારણોસર વિલંબ થાય ત્યારે હું એક કપ ચા પીઉં છું.'