પાકિસ્તાન સાથે વિવાદ વચ્ચે ભારતે એશિયા કપ 2025માંથી નામ પાછું ખેંચ્યું! રિપોર્ટ્સમાં મોટો દાવો

Asia Cup 2025 : ભારતીય ક્રિકેટ કંટ્રોલ બોર્ડે આગામી એશિયા કપને લઈને એક મોટો નિર્ણય લીધો છે. એક રિપોર્ટમાં દાવો કરવામાં આવ્યો છે કે BCCIએ આગામી મહિલા (ઇમર્જિંગ મહિલા એશિયા કપ) અને પુરુષોના એશિયા કપમાં રમવાની ના પાડી દીધી છે.

Asia Cup 2025 : ભારત અને પાકિસ્તાન વચ્ચે ચાલી રહેલા વિવાદ વચ્ચે હવે એક મોટા સમાચાર સામે આવ્યા છે. ટીમ ઈન્ડિયાએ આ વર્ષે સપ્ટેમ્બરમાં યોજાનારી મેન્સ એશિયા કપ 2025 ટુર્નામેન્ટમાંથી પોતાનું નામ પાછું ખેંચી લીધું છે. આ મોટો દાવો ઇન્ડિયન એક્સપ્રેસના અહેવાલમાં કરવામાં આવ્યો છે. આ અહેવાલ મુજબ, BCCIએ એશિયન ક્રિકેટ કાઉન્સિલ (ACC)ને જાણ કરી છે કે તે જૂનમાં શ્રીલંકામાં યોજાનાર મહિલા ઇમર્જિંગ ટીમ એશિયા કપ અને સપ્ટેમ્બરમાં યોજાનાર પુરુષ એશિયા કપમાંથી ખસી રહ્યું છે. પાકિસ્તાની મંત્રી મોહસીન નકવી એશિયન ક્રિકેટ કાઉન્સિલ (ACC)ના વર્તમાન પ્રમુખ છે.

ભારતે એશિયા કપ 2025માંથી નામ પાછું ખેંચ્યું!

સૂત્રોના જણાવ્યા અનુસાર, ભારતીય ક્રિકેટ કંટ્રોલ બોર્ડ (BCCI)નો આ નિર્ણય પાકિસ્તાન ક્રિકેટને અલગ પાડવાના પ્રયાસનો એક ભાગ છે. બીસીસીઆઈના એક સૂત્રએ જણાવ્યું હતું કે, 'ભારતીય ટીમ એસીસી દ્વારા આયોજિત ટુર્નામેન્ટમાં રમશે નહીં, જેનું નેતૃત્વ પાકિસ્તાની મંત્રી કરે છે.' આ દેશની ભાવના છે. અમે આગામી મહિલા ઇમર્જિંગ ટીમ્સ એશિયા કપમાંથી અમારા ખસી જવા અંગે ACCને મૌખિક રીતે જાણ કરી દીધી છે અને ભવિષ્યમાં તેમની ઇવેન્ટ્સમાં અમારી ભાગીદારી પણ બંધ કરી દેવામાં આવી છે. અમે ભારત સરકાર સાથે સતત સંપર્કમાં છીએ.

રિપોર્ટ્સમાં મોટો દાવો

બીસીસીઆઈના આ વલણથી સપ્ટેમ્બરમાં ભારતમાં યોજાનારા મેન્સ એશિયા કપ પર પ્રશ્નાર્થ ચિહ્ન ઊભો થયો છે. ભારત, પાકિસ્તાન, બાંગ્લાદેશ, અફઘાનિસ્તાન અને શ્રીલંકા વચ્ચે રમાતી આ ટુર્નામેન્ટ હાલ પૂરતી મુલતવી રાખવામાં આવી શકે છે. સૂત્રોએ જણાવ્યું હતું કે BCCI જાણે છે કે ભારત વિના એશિયા કપનું આયોજન શક્ય નથી કારણ કે આંતરરાષ્ટ્રીય ક્રિકેટ ઇવેન્ટ્સના મોટાભાગના સ્પોન્સર ભારતના છે. વધુમાં ભારત અને પાકિસ્તાન મેચ વિના બ્રોડકાસ્ટર્સને એશિયા કપમાં રસ નહીં હોય. સોની પિક્ચર્સ નેટવર્ક્સ ઇન્ડિયા (SPNI) દ્વારા આગામી આઠ વર્ષ માટે 170 મિલિયન US ડોલરમાં 2024 એશિયા કપના અધિકારો હસ્તગત કરવામાં આવ્યા છે. જો ટુર્નામેન્ટની આ આવૃત્તિ નહીં થાય, તો સોદો ફરીથી કરવો પડશે.

મોટાભાગના સ્પોન્સર ભારતના છે

એશિયન ક્રિકેટ કાઉન્સિલ (ACC)ના પાંચ પૂર્ણ-સમયના સભ્યો - ભારત, પાકિસ્તાન, બાંગ્લાદેશ, શ્રીલંકા અને અફઘાનિસ્તાન - ને પ્રસારણ આવકનો 15 ટકા હિસ્સો મળે છે. આ સિવાય બાકીનો ભાગ સહયોગીઓમાં વહેંચવામાં આવે છે. એશિયા કપના મોટાભાગના સ્પોન્સર ભારતના છે, તેથી BCCIના આ નિર્ણયને કારણે એશિયા કપ 2025 રદ થઈ શકે છે. 

જો કે, આ મામલે BCCIએ હવે પોતાનું નિવેદન બહાર પાડ્યું છે, જેમાં કહેવામાં આવ્યું છે કે હાલમાં BCCIનું ધ્યાન આના પર નથી. BCCI પ્રમુખ દેવજીત સૈકિયાએ કહ્યું કે, 'આજ સવારથી, અમને કેટલાક અહેવાલો મળ્યા છે કે BCCIએ એશિયા કપ અને મહિલા ઇમર્જિંગ ટીમ એશિયા કપમાં ભાગ ન લેવાનો નિર્ણય લીધો છે, જે બંને ACC ઇવેન્ટ છે.' આવા સમાચારોમાં કોઈ સત્ય નથી કારણ કે અત્યાર સુધી BCCIએ ACCના આગામી કાર્યક્રમ અંગે કોઈ ચર્ચા કરી નથી કે કોઈ પગલું ભર્યું નથી.