ભારતીય ખેલાડીએ અચાનક ટીમ બદલવાની કરી જાહેરાત, આગામી સિઝન પહેલા મોટો ઉલટફેર

આ ભારતીય ડાબોડી સ્પિનરે ​ટીમ બદલવાનો નિર્ણય લીધો છે. આ માટે તેને મંજૂરી પણ મળી ગઈ છે. સૌરભ ઘણી વખત ભારતીય નેશનલ ટીમનો ભાગ રહી ચૂક્યો છે. જોકે, આ ખેલાડીને ભારત માટે ડેબ્યૂ કેપ પહેરવાની તક મળી નથી.

Saurabh Kumar : ભારતીય ટીમનો ભાગ રહેલા ડાબોડી સ્પિનર ​​સૌરભ કુમારે આગામી સ્થાનિક સિઝન પહેલા ટીમ બદલવાનો નિર્ણય લીધો છે. સૌરભ ઘણા વર્ષોથી ઉત્તર પ્રદેશ માટે ઘરેલુ ટુર્નામેન્ટ રમતો હતો. પરંતુ હવે આ ખેલાડીએ આંધ્ર પ્રદેશ તરફથી રમવાનું નક્કી કર્યું છે. સૌરભ કુમાર ઘણી વખત ભારતીય ટીમમાં જોડાયો છે. પરંતુ તેને હજુ સુધી ટીમ ઇન્ડિયા તરફથી ડેબ્યૂ મળ્યું નથી. જોકે, આ સ્ટાર ખેલાડી ઘણી વખત ઇન્ડિયા A, ઇન્ડિયા D અને ઇન્ડિયા બ્લુ માટે રમી ચૂક્યો છે.

UPCA અને ACA તરફથી મંજૂરી

સૌરભને ઉત્તર પ્રદેશ ક્રિકેટ એસોસિએશન અને આંધ્ર ક્રિકેટ એસોસિએશન તરફથી લીલી ઝંડી મળી ગઈ છે. સૌરભને હવે આંધ્ર માટે રમવા માટે ભારતીય ક્રિકેટ બોર્ડની સંમતિની જરૂર છે, જે ફક્ત એક ઔપચારિકતા છે. સૌરભ વિશે વાત કરીએ તો, તે ઇંગ્લેન્ડ સામેની શ્રેણી તેમજ બાંગ્લાદેશ અને શ્રીલંકાના વિદેશી પ્રવાસ માટે ભારતીય સિનિયર નેશનલ ટીમનો ભાગ હતો. પરંતુ આ ખેલાડીને પ્લેઇંગ ઇલેવનમાં સ્થાન મળ્યું નહોતું

હું આંધ્ર માટે રમવા માટે ઉત્સાહિત છું - સૌરભ

ક્રિકબઝ સાથે વાત કરતાં, સૌરભે કહ્યું કે હું આંધ્ર માટે રમવા માટે ઉત્સાહિત છું. હું આગામી સિઝનની આતુરતાથી રાહ જોઈ રહ્યો છું. મને આશા છે કે હું આંધ્રને ઓછામાં ઓછું આ ફોર્મેટમાં ટાઇટલ અપાવીશ અને રણજી ટ્રોફીની ફાઇનલમાં લઈ જઈશ.

સૌરભની મજબૂત બોલિંગ

સૌરભે 2018-19 રણજી સિઝનમાં 50થી વધુ વિકેટ લીધી હતી. અત્યાર સુધીમાં, તેણે 79 ફર્સ્ટ-ક્લાસ મેચોમાં 2.76ની ઇકોનોમી અને 26.45ની એવરેજ સાથે 324 વિકેટ લીધી છે. જ્યારે લિસ્ટ A મેચોમાં, આ ખેલાડીએ 51 બેટ્સમેનોને પોતાનો શિકાર બનાવ્યા છે. આ ઉપરાંત, તેણે 33 T-20 મેચોમાં 24 વિકેટ લીધી છે.