GPSCએ જાહેર કર્યો પરીક્ષાનો કાર્યક્રમ, તૈયારી કરતા ઉમેદવારો નોંધી લે આ તારીખ

ગુજરાત જાહેર સેવા આયોગ દ્વારા આગામી સમયમાં વર્ગ 1, 2 અને 3ની લેવાનારી વિવિધ પરીક્ષાનો કાર્યક્રમ જાહેર કરવામાં આવ્યો છે. જીપીએસસીએ પ્રિલીમનરી અને મુખ્ય પરીક્ષાની તારીખો જાહેર કરી છે.

ગાંધીનગરઃ સરકારી પરીક્ષાની તૈયારી કરતા લોકો માટે સારા સમાચાર સામે આવ્યા છે. ગુજરાત પબ્લિક સર્વિસ કમિશન (GPSC) એ આગામી પરીક્ષાનું ટાઈમટેબલ નક્કી કર્યું છે. પરીક્ષા બાદ પરિણામનો સમય પણ નક્કી કરવામાં આવ્યો છે. જીપીએસસીના ચેરમેન હસમુખ પટેલે આ અંગે માહિતી આપી છે. જીપીએસસી દ્વારા આગામી સમયમાં કઈ તારીખે પરીક્ષા લેવામાં આવશે તેની માહિતી આપવામાં આવી છે.

પરીક્ષાની તારીખ જાહેર
જીપીએસસીએ આપેલી માહિતી પ્રમાણે ગુજરાત મુલ્કી સેવા વર્ગ-1 તથા ગુજરાત વહીવટી સેવા ક્લાસ 1/2 ની પ્રિલીમનરી પરીક્ષા 20 એપ્રિલ 2025ના લેવાશે. જ્યારે મુખ્ય પરીક્ષા 20, 21, 27 અને 28 સપ્ટેમ્બર 2025ના લેવાશે. તો મદદનીશ વન સંરક્ષક તથા પરિક્ષેત્ર વન અધિકારી વર્ગ-2ની પ્રિલીમનરી પરીક્ષા 6 જૂન 2025ના લેવાશે. જ્યારે મુખ્ય પરીક્ષા 10થી 17 ડિસેમ્બર 2025 દરમિયાન લેવામાં આવશે.

વર્ગ ત્રણની પરીક્ષાનો કાર્યક્રમ
જીપીએસસીએ આપેલી માહિતી પ્રમાણે રાજ્ય વેરા નિરીક્ષક વર્ગ- 3ની પ્રિલીમનરી પરીક્ષા 21 ડિસેમ્બરના રોજ લેવાશે. જ્યારે મુખ્ય પરીક્ષા 1થી 10 જૂન 2026 વચ્ચે લેવાશે. તો નાયબ સેક્શન ઓફિસર/ નાયબ મામલતદાર વર્ગ-3ની પ્રિલીમ પરીક્ષા 7 સપ્ટેમ્બર 2025ના લેવાશે, જ્યારે મુખ્ય પરીક્ષા ફેબ્રુઆરી 2026માં લેવામાં આવશે. 

આ સિવાય જીપીએસસીએ ઓક્ટોબર 2024માં લીધેલી વર્ગ- 1 અને 2ની પરીક્ષાનું પરિણામ આવતા વિલંબ થઈ શકે છે. કોર્ટ કેસ અને ત્યારબાદ મૂલ્યાંકનને કારણે હજુ ચારથી પાંચ મહિના આ પરિણામ આવવામાં લાગી શકે છે. Dyso ની પરીક્ષાના પરિણામમાં પણ વિલંબ થવાની સંભાવના છે.