પેરિસ-દિલ્હી-અમદાવાદ...ક્રેશ થયા પહેલા ક્યાં ક્યાં ફરીને આવ્યું હતું પ્લેન? ઉડ્ડયન મંત્રાલયે કર્યો ખુલાસો

Plane Crash: મંત્રીએ જણાવ્યું હતું કે દુર્ઘટનાસ્થળથી બ્લેક બોક્સ કાલે સાંજે 5 વાગે મળી આવ્યું છે. AAIB ટીમ માને છે કે આ બ્લેક બોક્સને ડીકોડ કરવાથી અકસ્માત પહેલા શું થયું હતું તે જાણવા મળશે.

Aviation Ministry Press Conference: અમદાવાદ વિમાન દુર્ઘટનાના ત્રીજા દિવસે ઉડ્ડયન મંત્રી રામ મોહન નાયડુ અને સચિવ સમીર કુમાર સિંહાએ એક પ્રેસ કોન્ફરન્સ યોજી હતી. આ દરમિયાન તેમણે જણાવ્યું હતું કે અકસ્માતની પહેલી માહિતી એર ટ્રાફિક કંટ્રોલ અમદાવાદ તરફથી મળી હતી. નાગરિક ઉડ્ડયન મંત્રાલયના સચિવ સમીર કુમાર સિંહાએ જણાવ્યું હતું કે 12 જૂનના રોજ બપોરે 2 વાગ્યે અમદાવાદથી લંડન ગેટવિક જતી ફ્લાઇટ AIC 171 ક્રેશ થઈ હતી. 

ATC અમદાવાદ તરફથી આ માહિતી મળી હતી. વિમાનમાં કુલ 242 લોકો સવાર હતા, જેમાં 230 મુસાફરો, 2 પાઇલટ અને 10 ક્રૂ સભ્યોનો સમાવેશ થાય છે. વિમાને બપોરે 1:39 વાગ્યે ઉડાન ભરી હતી અને 650 ફૂટની ઊંચાઈએ પહોંચતાની સાથે જ તેની ઊંચાઈ ઘટવા લાગી હતી.

'મે ડે' કોલ આપીને ફૂલ ઈમરજન્સીની સૂચના 
તેમણે જણાવ્યું કે ઉડાન ભર્યાની થોડીક સેકન્ડ પછી પાયલોટે અમદાવાદ એટીસીને 'મે ડે' કોલ આપીને સંપૂર્ણ કટોકટીની જાણ કરી. જ્યારે એટીસીએ ફરીથી સંપર્ક કરવાનો પ્રયાસ કર્યો, ત્યારે કોઈ જવાબ મળ્યો નહીં. માત્ર એક મિનિટ પછી વિમાન એરપોર્ટથી માત્ર 2 કિ.મી દૂર મેઘાણીનગર વિસ્તારમાં ક્રેશ થયું. વિમાનના કેપ્ટન સુમિત સભરવાલ હતા અને પ્રથમ અધિકારી ક્લાઈવ સુંદર હતા. આ અકસ્માત પહેલા આ વિમાને પેરિસ-દિલ્હી-અમદાવાદ સેક્ટરની ફ્લાઇટ્સ કોઈપણ સમસ્યા વિના પૂર્ણ કરી હતી.

બે દિવસ ખૂબ જ મુશ્કેલ રહ્યા..
કેન્દ્રીય નાગરિક ઉડ્ડયન મંત્રી રામ મોહન નાયડુ કિંજરાપુએ જણાવ્યું હતું કે અમદાવાદ એરપોર્ટ નજીક થયેલા વિમાન દુર્ઘટનાએ સમગ્ર દેશને હચમચાવી નાખ્યો છે. તેમણે પીડિત પરિવારો પ્રત્યે ઊંડી સંવેદના વ્યક્ત કરી હતી અને કહ્યું હતું કે છેલ્લા બે દિવસ ખૂબ જ મુશ્કેલ રહ્યા છે. મંત્રીએ કહ્યું કે તેઓ પોતે તાત્કાલિક ઘટનાસ્થળે પહોંચ્યા હતા જેથી રાહત કાર્યની સમીક્ષા કરી શકાય અને જરૂરી મદદ સમયસર પૂરી પાડી શકાય. ગુજરાત સરકાર અને ભારત સરકાર દ્વારા સંપૂર્ણ સહયોગ આપવામાં આવ્યો હતો.

તેમણે કહ્યું કે જ્યારે તેઓ ઘટનાસ્થળે પહોંચ્યા ત્યારે બચાવ ટીમો કામ શરૂ કરી દીધી હતી. આગ ઓલવવાનું, કાટમાળ દૂર કરવાનું અને મૃતદેહોને હોસ્પિટલમાં લઈ જવાનું કામ યુદ્ધના ધોરણે ચાલી રહ્યું હતું. મંત્રીએ કહ્યું કે એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) તાત્કાલિક સક્રિય કરવામાં આવ્યું હતું, જે આવા અકસ્માતોની ટેકનિકલ તપાસ માટે બનાવવામાં આવ્યું છે.

વિસ્તૃત રિપોર્ટ આવવાની જોવાઈ રહી છે રાહ
મંત્રીએ કહ્યું કે ગઈકાલે સાંજે 5 વાગ્યે અકસ્માત સ્થળેથી બ્લેક બોક્સ મળી આવ્યું હતું. AAIBની ટીમ માને છે કે આ બ્લેક બોક્સને ડીકોડ કરવાથી અકસ્માત પહેલા શું બન્યું હતું તે બહાર આવશે. હવે દરેક વ્યક્તિ તપાસ પૂર્ણ થાય અને વિગતવાર અહેવાલ આવે તેની રાહ જોઈ રહ્યા છે જે વાસ્તવિક કારણો જાહેર કરશે.

આ ઉપરાંત એવું કહેવામાં આવ્યું હતું કે અકસ્માત પછી અમદાવાદ એરપોર્ટનો રન-વે બપોરે 2:30 વાગ્યે બંધ કરી દેવામાં આવ્યો હતો. તમામ જરૂરી તપાસ અને પ્રોટોકોલ પૂર્ણ કર્યા પછી સાંજે 5 વાગ્યાથી કેટલીક મર્યાદિત ફ્લાઇટ્સ માટે રન-વે ફરીથી ખોલવામાં આવ્યો હતો. આ મામલાની વિગતવાર તપાસ ચાલી રહી છે. રિપોર્ટ આવવામાં સમય લાગી શકે છે.