સુખનો પ્રસંગ માતમમાં ફેરવાયો! સગાઈના એક દિવસ પહેલા અકસ્માતમાં યુવકનું મોત, હેલ્મેટ ન પહેરવું ભારે પડ્યું

Youth Died Before Engagement : સુરતમાં 28 વર્ષીય શિક્ષકનું અકસ્માતમાં મોત નિપજ્યું, કોચિંગ ક્લાસથી ચાની કીટલીએ જતા હતા ત્યારે રીક્ષાચાલકે અટફેડે લીધા

Surat News પ્રશાંત ઢીવરે/સુરત : સુરતના અલથાણ વિસ્તારમાં એક હૃદયદ્રાવક ઘટના બની છે. શેરબજારના શિક્ષક અને મૂળ મહારાષ્ટ્રના ધુલિયા નિવાસી 28 વર્ષીય રાહુલ ઠાકુરનું સગાઈના માત્ર એક દિવસ પહેલા જ એક માર્ગ અકસ્માતમાં કરુણ મોત નિપજ્યું છે. હેલ્મેટ વગર બાઇક ચલાવી રહ્યા હોવાથી તેમને માથાના ભાગે ગંભીર ઈજાઓ પહોંચી હતી, જે તેમના મોતનું કારણ બની.

પ્રાપ્ત માહિતી અનુસાર, રાહુલ ઠાકુર સુરતમાં શિક્ષક તરીકે ફરજ બજાવે છે. અલથાણ ખાતે આવેલા તેમના કોચિંગ ક્લાસથી નજીકમાં આવેલી ચાની દુકાને ચા પીવા જઈ રહ્યા હતા. સામાન્ય રીતે રાહુલ હંમેશા હેલ્મેટ પહેરતા હતા, પરંતુ આ નજીકના અંતર માટે તેમણે હેલ્મેટ પહેરવાનું ટાળ્યું હતું. આ દરમિયાન, બેફામ રીતે આવી રહેલા એક ઓટોરિક્ષા ચાલકે તેમની બાઇકને જોરદાર ટક્કર મારી હતી. 

અકસ્માત બાદ રાહુલ ઠાકુરને માથાના ભાગે ગંભીર ઈજાઓ પહોંચી હતી. તેમને તાત્કાલિક સારવાર અર્થે સિવિલ હોસ્પિટલમાં ખસેડવામાં આવ્યા હતા, પરંતુ ટૂંકી સારવાર બાદ તેમનું મોત નિપજ્યું હતું. રાહુલ ઠાકુરના અકાળ અવસાનથી તેમના પરિવાર, મિત્રો અને વિદ્યાર્થીઓમાં શોકનું મોજુ ફરી વળ્યું છે. પરિવારજનોએ રીક્ષા ચાલક વિરુદ્ધ કડક કાર્યવાહીની માંગ કરી છે.

આ મામલે અલથાણ પોલીસે અકસ્માતનો ગુનો નોંધી વધુ તપાસ હાથ ધરી છે. આ ઘટના ફરી એકવાર હેલ્મેટના મહત્વ અને બેદરકારીથી થતા ગંભીર પરિણામોની યાદ અપાવે છે.