પ્રામાણિક ગણાતા વડોદરામાં ફાયરબ્રિગેડને લાગ્યો ભ્રષ્ટાચારનો લૂણો; કરોડોનું કૌભાંડ આચરાયું!

Vadodara News: ગુજરાતમાં એક પછી એક કૌભાંડોનો પર્દાફાશ થઈ રહ્યો છે, ત્યારે વડોદરા મહાનગર પાલિકાના પ્રામાણિક ગણાતા ફાયરબ્રિગેડ વિભાગને પણ હવે ભ્રષ્ટાચારનો લૂણો લાગ્યો છે. વડોદરા ફાયર બ્રિગેડ દ્વારા 3.17 કોરોડનાં સાધનોની ખરીદીમાં મસમોટું કૌભાંડ ઝડપાયું છે. કેટલીક આઈટમો મેડ ઇન ચાઇનાની, હલકી કક્ષાની અને બ્રાન્ડ વગરની હોવાનું ચર્ચાઈ રહ્યું છે.

વડોદરા ફાયર બ્રિગેડમાં સાધનોની ખરીદીમાં કૌભાંડની ગંધ આવતા ખળભળાટ મચી જવા પામ્યો છે. વડોદરા ફાયર બ્રિગેડમાં 3.17 કરોડના સાધનોની ખરીદી 8થી 10 ઘણા ભાવે કરવામાં આવી રહી છે. ફાયર બ્રિગેડ વિભાગના વડા મનોજ પાટીલ અને ખરીદીમાં જોડાયેલા લોકોએ ભ્રષ્ટાચાર કર્યો હોવાની ફરિયાદ ઉઠી છે. 

બજારમાં 280 રૂપિયામાં મળતી વ્હિસલ(સીસોટી) 3238.73 રૂપિયામાં ખરીદી હોવાનું સામે આવ્યું છે. એટલું જ નહીં, બજારમાં 1400માં મળતી પાણીની બોટલ 3639માં ખરીદી, 275માં મળતું પોકેટ ચપ્પુ 3639માં ખરીદ્યું. LED ટોર્ચ બજારમાં 1800 માં મળે છે, જેના 18898 રૂપિયા ચૂકવાયા છે. ટૂલ કીટ 3800માં મળે છે, જેના 18198 રૂપિયા ચૂકવ્યા છે. 

વડોદરામાં આ કૌભાંડ સામે આવતા જ સમગ્ર મામલે વિપક્ષે કહ્યું ભ્રષ્ટ તંત્રએ તમામ હદો વટાવી દીધી છે. જેનામાં આવડત કે અનુભવ નથી તેવી વ્યક્તિને ફાયર બ્રિગેડની જવાબદારી સોંપવામાં આવી છે. ફાયરના સંસાધનો ખરીદવામાં મોટું કૌભાંડ આચર્યું છે તેમાં કોઈ શંકાને સ્થાન નથી. સમગ્ર મામલે ઉચ્ચ સ્તરીય તપાસ થવી જોઈએ. 

પાલિકાના ડે. મ્યુ કમિશ્નર ગંગાસિંહ રાજપુરોહિતે જણાવ્યું હતું કે સમગ્ર મામલો અમારી પાસે આવ્યો છે. મામલાની ગંભીરતા જોતા તપાસના આદેશ અપાયા છે. ખરીદી ક્યાં નિયમો હેઠળ કરાઈ તેની ખરાઇ કરીશું. જો કોઈ કૌભાંડ થયું હશે તો યોગ્ય કાર્યવાહી કરીશું. ફાયર બ્રિગેડમાં પણ અસલીને બદલે નકલી આઈટમોની ખરીદાઈ છે.