શુભમન ગિલની ટીમ માટે 'ગૂડ ન્યુઝ', આ ઘાતક બોલર પરથી હટ્યો પ્રતિબંધ, હવે IPLમાં મચાવશે તબાહી

IPL 2025 : IPL 2025માં શાનદાર શરૂઆત કરનાર ગુજરાત ટાઇટન્સને મુશ્કેલ સમયમાં સારા સમાચાર મળ્યા છે. પ્લેઓફની નજીક ટીમની બે હારથી કેપ્ટન ગિલ ટેન્શનમાં છે. ત્યારે ગુજરાતની ટીમ તેની આગામી મેચ મુંબઈ ઈન્ડિયન્સ સામે વાનખેડે ખાતે રમશે. તે પહેલાં ટીમને સારા સમાચાર મળ્યા છે.

IPL 2025 : ગુજરાતની આગામી મેચ મુંબઈ ઈન્ડિયન્સ સામે છે, ત્યારે આ મેચ પહેલાં ટીમને સારા સમાચાર મળ્યા છે. અત્યાર સુધી સિઝનમાં ગુજરાતની બેટિંગ મજબૂત દેખાઈ છે, પરંતુ બોલિંગ નબળી દેખાઈ રહી છે. જોકે, હવે ટીમને ઘાતક બોલર કાગીસો રબાડા તરફથી સારા સમાચાર મળ્યા છે.

રબાડા પરથી પ્રતિબંધ હટાવાયો

આ વર્ષની શરૂઆતમાં દક્ષિણ આફ્રિકા T20 લીગ દરમિયાન ડ્રગના ઉપયોગ બદલ રબાડા પર પ્રતિબંધ મૂકવામાં આવ્યો હતો, જે હવે હટાવી લેવામાં આવ્યો છે. સાઉથ આફ્રિકન ઇન્સ્ટિટ્યૂટ ફોર ડ્રગ ફ્રી સ્પોર્ટ્સ (SAIDS) દ્વારા આ વાતની પુષ્ટિ કરવામાં આવી છે. જાન્યુઆરીમાં MI કેપ ટાઉન અને ડર્બન સુપર જાયન્ટ્સ વચ્ચેની મેચ પછી રબાડા ડોપિંગ ટેસ્ટમાં નિષ્ફળ ગયો હતો. તેણે આઈપીએલમાં ફક્ત બે મેચ રમી હતી, પરંતુ હવે તેનો પ્રતિબંધ હટાવી લેવામાં આવ્યો છે અને તે વાપસી કરવા માટે તૈયાર છે. SAIDSના મતે, તે તરત જ પોતાની રમત રમી શકે છે.

રબાડાએ માફી માંગી

મીડિયા અહેવાલ મુજબ, રબાડાએ આ માટે માફી માંગી છે. રબાડાએ કહ્યું, 'જેમને મેં નિરાશ કર્યા છે તે બધાની હું દિલથી માફી માંગુ છું.' હું ક્રિકેટ રમવાના અધિકારને ક્યારેય હળવાશથી નહીં લઉં. આ વિશેષાધિકાર મારા કરતાં ઘણો મોટો છે. આ મારી અંગત આકાંક્ષાઓથી પર છે.

મુંબઈ સામે વાપસી થઈ શકે છે

ગુજરાતની ટીમ 6 મેના રોજ મુંબઈ ઇન્ડિયન્સ સામે રમશે. આ મેચમાં રબાડા પરત ફરી શકે છે, જે બોલિંગ યુનિટને મજબૂત બનાવશે. વર્લ્ડ ટેસ્ટ ચેમ્પિયનશિપ ફાઇનલને લઈને દક્ષિણ આફ્રિકાની ટીમને પણ રાહત મળી છે. જૂનમાં રમાનારી ફાઇનલમાં રબાડા ટીમ માટે મહત્વપૂર્ણ ભૂમિકા ભજવી શકે છે.