વિરાટ કોહલીએ ટેસ્ટ ક્રિકેટમાંથી નિવૃત્તિ કેમ લીધી ? અજિત અગરકરે પ્રેસ કોન્ફરન્સમાં ખોલ્યું મોટું રહસ્ય

Virat Kohli Retirement : વિરાટ કોહલીની ટેસ્ટ ક્રિકેટમાંથી નિવૃત્તિ અંગેની બધી અટકળો પર અજિત અગરકરે પૂર્ણવિરામ મૂકી દીધું છે. તેમણે કોહલીએ ટેસ્ટ ક્રિકેટમાંથી નિવૃત્તિ કેમ લીધી તેના અંગે સ્પષ્ટતા કરી છે.

Virat Kohli Retirement : BCCIએ 20 જૂનથી શરૂ થનારી ઇંગ્લેન્ડ સામેની ટેસ્ટ શ્રેણી માટે ટીમની જાહેરાત કરી છે. શુભમન ગિલ નવો કેપ્ટન અને ઋષભ પંત ઉપ-કેપ્ટન હશે. મુખ્ય પસંદગીકાર અજિત અગરકરે મુંબઈમાં એક પ્રેસ કોન્ફરન્સમાં ટીમની જાહેરાત કરી હતી. આ દરમિયાન જ્યારે તેમને વિરાટ કોહલીની નિવૃત્તિ વિશે પૂછવામાં આવ્યું, ત્યારે અગરકરે કહ્યું કે વિરાટ કોહલીએ એપ્રિલની શરૂઆતમાં જ ટેસ્ટ ક્રિકેટમાંથી નિવૃત્તિ લેવાનો નિર્ણય લીધો હતો. પરંતુ તેની જાહેરાત 12 મેના રોજ કરવામાં આવી હતી.

'નિર્ણય અચાનક નહોતો પણ...'

ઈંગ્લેન્ડ સામેની ટેસ્ટ શ્રેણી માટે ટીમની જાહેરાત અંગેની પ્રેસ કોન્ફરન્સ દરમિયાન અગરકરે કહ્યું કે કોહલીએ પોતે તેમનો સંપર્ક કર્યો હતો અને તેમને કહ્યું હતું કે હવે ટેસ્ટ ક્રિકેટને અલવિદા કહેવાનો સમય આવી ગયો છે. અજિત અગરકરે કહ્યું કે વિરાટનો નિર્ણય અચાનક નહોતો પરંતુ ઘણો વિચાર કર્યા પછી લેવામાં આવ્યો હતો. બોર્ડર-ગાવસ્કર ટ્રોફી પછી રણજી ટ્રોફી રમવા છતાં તેણે ટેસ્ટમાંથી નિવૃત્તિ લેવાનું મન બનાવી લીધું હતું.

અગરકરે બધી અટકળોનો અંત લાવ્યો

આનો સ્પષ્ટ અર્થ એ છે કે અજિત અગરકરે કોહલીના આ નિર્ણય અંગેની બધી અટકળો પર પૂર્ણવિરામ મૂકી દીધું છે. તેમણે સ્પષ્ટપણે કહ્યું કે વિરાટે એપ્રિલની શરૂઆતમાં જ કહ્યું હતું કે તે ટેસ્ટ ક્રિકેટ છોડવા માંગે છે. તમને જણાવી દઈએ કે વિરાટે 12 મેના રોજ નિવૃત્તિની જાહેરાત કરી હતી.

આજે ભારતીય ટીમની જાહેરાત કરવામાં આવી છે. જેમાં નવા કેપ્ટન અને નવા ઉપ-કેપ્ટનના નામની પણ જાહેરાત કરવામાં આવી છે. શુભમન ગિલ કેપ્ટન, ઋષભ પંત વાઈસ કેપ્ટન, યશસ્વી જયસ્વાલ, કેએલ રાહુલ, સાઈ સુદર્શન, અભિમન્યુ ઈશ્વરન, કરુણ નાયર, નીતિશ રેડ્ડી, રવિન્દ્ર જાડેજા, ધ્રુવ જુરેલ, વોશિંગ્ટન સુંદર, શાર્દુલ ઠાકુર, જસપ્રીત બુમરાહ, મોહમ્મદ સિરાજ, પ્રસિદ્ધ કૃષ્ણા, આકાશદીપ, અર્શદીપ સિંહ, કુલદીપ યાદવ.